Harmonia

Eus Wikipedia
Mont da : merdeiñ, klask
Harmonia hag an naer (taolenn gant Evelyn De Morgan).

Harmonia (Άρμονία Harmonia e gregach), doueez an Emglev, ha dreist-holl an emglev etre ar priedoù, a oa merc'h da Ares ha da Afrodite, hervez mojennoù zo eus Hellaz kozh, pe merc'h da Hefaistos hag Afrodite, hervez mojennoù all, pe da Zeus ha da Elektra hervez mojennoù all c'hoazh.

Enebet e oa ouzh Eris, doueez an Dizemglev, ha heñvelekaet ouzh Concordia, doueez ar Romaned.

Dimezet e oa gant Kadmos, roue Thebai.

Mojenn[kemmañ | kemmañ ar vammenn]

Pa voe fiziet gouarnamant Thebai e Kadmos gant Athena e voe roet dezhañ Harmonia da bried gant Zeus.

Da zevezh hec'h eured e oa a deuet an holl zoueed, ha profet e voe dezhi un dro-c'houzoug graet gant Hefaistos, hag ur peplos gant ar C'harited. Sachañ a raio ar profoù-se droukchañs war gein o holl ferc'henned da-heul.

Gant Kadmos he doe meur a vugel: Ino, Polydoros, Autonoe, Agaue ha Semele.

Tro-c'houzoug ar wallchañs[kemmañ | kemmañ ar vammenn]

Gant Polynikes e voe profet an dro-c'houzoug da Erifyle, dezhi da gendrec'hiñ he gwaz Amfiaraos da vont da vrezeliñ a-enep Thebai. Diwar-se e teuas marv Erifile, Alkmaion, ha Fegeos hag e vibien.

Petra bennak ma voe fiziet an dro-c'houzoug e templ Athena Pronoia e Delfi e kendalc'has ar wallblanedenn.

Fayllos ur penn-brezel eus Fokis, er Brezel Sakr (352 kent JK) a laeras an dro-c'houzoug d'he reiñ d'e serc'h. He dougen a reas-hi ur pennad. Treiñ foll a reas he mab, c'hwezhañ an tan en he zi, ha devet e voe ar vamm.

Harmonia a oa, hervez un doare all, eus Samothrake, ha merc'h da Zeus hag Elektra, ha c'hoar da Iasion, an hini a ziazezas al lidoù sakr en enez.

Tost eo Harmonia da Afrodite Pandemos, doueez ar gengarantez etre an dud, an urzh hag an unvaniezh, a glot gant Concordia ar Romaned.

Gwelout[kemmañ | kemmañ ar vammenn]