Dark Horse Records

Dark Horse Records a oa un ti-embann pladennoù, bet krouet gant an arzour saoz George Harrison (1943-2001) e miz Mae 1974. Anv al label a oa bet dibabet diwar anv ur ganaouenn gant Harrison — Dark Horse — bet enrollet un nebeud mizioù kent.

Pa dremenas Harrison e 2001 e kemeras e wreg Olivia (1948-) hag e vab Dhani (1978-) penn an embregerezh.

O kregiñ gant Splinter[kemmañ | kemmañ ar vammenn]

Magañ a rae George Harrison ur gwir garantez ouzh ar sonerezh hag, a-viskoazh, e voe an hini e-touez pevar ezel The Beatles a glaskas liammañ darempredoù kreñv gant sonerien all er-maez eus ar strollad. Gantañ eo e voe pedet Eric Clapton (1945-) ha Billy Preston (1946-2006) da gemer perzh ingal en enrolladenn pladennoù 'zo pe e pleustradegoù. A drugarez dezhañ e voe produet gant Apple Records oberennoù meur a arzour evel ar strollad Badfinger, Jackie Lomax (1944-2013), Ravi Shankar (1920-2012) ha Doris Troy (1937-2004).

Pa grogas Apple Records, ti-embann pladennoù ar strollad The Beatles, da vont da fall e reas Harrison e vennozh sevel e gevredigezh produiñ dezhañ. Daou ganer an daouad Splinter a oa o paouez bezañ krouet a voe kentañ arzourien^[1] o sinañ evit Dark Horse Records. Tri albom a voe embannet (hag un toullad Singles hag Extended Plays (EPs)) :

The Place I Love (embannet e voe ar ganaouenn Costafine Town d'an 13 a viz Gwengolo 1974, ur sizhun a-raok an albom e-unan),
Harder To Live (1975),
Two Man Band (1977).

Ravi Shankar[kemmañ | kemmañ ar vammenn]

Kejet en devoa George Harrison gant Ravi Shankar e Londrez (Bro-Saoz) e miz Mezheven 1966. E Srinagar (Jammu ha Kachmir) en devoa desket ar gitarour saoz seniñ sitar digant ar soner indian nebeut amzer war-lerc'h, da-geñver ur veaj c'hwec'h sizhunvezh en India. Diwar neuze e oant chomet mignoned vras ha ne voe ket pell Shankar oc'h asantiñ bezañ produet e oberennoù gant an embregerezh yaouank ivez, daou albom en o zouez :

Shankar Family & Friends (miz Gwengolo 1974),
Ravi Shankar's Music Festival From India (miz C'hwevrer 1976).

George Harrison e-unan[kemmañ | kemmañ ar vammenn]

Evit George Harrison, liammet e oa dre gevrat ouzh EMI betek ar 27 a viz Genver 1976, evel pep ezel eus ar strollad The Beatles. Se zo kaoz ne voe ket evit embann e gentañ albom dre e label dezhañ nemet e miz Du 1976 :

Thirty Three & 1/3,
George Harrison (miz C'hwevrer 1979),
Somewhere in England (miz Mezheven 1981),
Gone Troppo (miz Du 1982),
Cloud Nine (miz Du 1987),
Brainwashed (miz Du 2002).

Levezonet-mat e voe Harrison gant ar vitologiezh hindouat e-kerzh e chomadenn eno en hañv 1976. Ma tibabas Uchchaihshravas, ar marc'h e seizh penn, da logo ofisiel e gevredigezh, goude bezañ gwelet ar skeudenn anezhañ ouzh ur voest houarn.