Timbroù Kiribati
Kiribati zo ur riez enezek eus ar Meurvor Habask gant 32 atoll hag un enezenn gouralek ouzh hec'h ober.
Dizalc'h eo abaoe an 12 a viz Gouere 1979, goude bezañ bet bro warezet ar Rouantelezh-Unanet dindan anv Inizi Gilbert, unvan a-fet melestradurezh gant inizi Ellice. Poblañs an inizi-se a zibabas sevel Stad Tuvalu diouzh o zu avat.
Timbroù Gilbert hag Ellice a voe implijet eno etre 1892 ha 1979. Dibabet ez eus bet gant postoù ar Republik nevez embann rummadoù timbroù liesliv a c'hellfe plijout da dastumerien ar bed. 441 timbr a voe embannet etre 1979 ha 1999 en ur vro a 88 000 annezad er bloavezh 2000....
Loened gouez ar vro ha famillh ar Rouanez Elesbed II a ra ul lodenn vat eus danvez an timbroù. War hogos pep hini e weler, en ur c'horn, banniel ar Stad.
E 1998 e voe embannet ur rummad timbroù gouestlet d'an efed ti-gwer, danvez-preder ankenius evit annezidi ur vro ken tost ouzh rezad ar mor. Souezhusoc'h avat eo ar rummad hag ar blok a vrud (e 2000) an abadenn skinwel evit ar vugale Sesame street...