Nambu 14
| Nambu Stumm 14 | |
| |
|---|---|
| Kinnig | |
| Bro orin | .svg){kind=small} Impalaeriezh Japan
|
| Doare | Pistolenn damaotomatek SA |
| Munisionoù | 8 x 22 mm Nambu |
| Saver | Kirijō Nambu |
| Mare implij | 1925 - 1945 (en arme japanat) |
| Produerien | |
| Skouerennoù produet | War-dro 282.300 |
| Pouez ha muzulioù | |
| Mas (hep kartouchenn) | 910 g |
| Mas (karget) | 990 g |
| Hirder | 231 mm |
| Hirder ar c'hanol | 115 mm |
| Perzhioù teknikel | |
| Endalc'h | 8 tenn |
| Lezenn | |
| Rummad e Bro-C'hall | B |
An Nambu Stumm 14 zo ur bistolenn damaotomatek un-ober japanat ijinet gant ar jeneral Kirijō Nambu (1869-1949) hag implijet evel pistolenn standard gant arme Japan e-pad ar brezel etre Sina ha Japan hag en Eil Brezel-bed. Anvet e vez alies Pistolenn Nambu nemetken, met pistolennoù all a zo bet krouet gant ar memes den. Dont a ra an niver 14 eus ar bloavezh m’eo bet lakaet e servij en arme japanat (1925), a oa 14vet bloavezh ren an impalaer Taishō Tennō, tad Hirohito.
Istor hag implij[kemmañ | kemmañ ar vammenn]
E 1902 e kinnigas Kijiro Nambu, a oa kabiten en arme japanat, ur bistolenn nevez anvet Stumm A. Abaoe fin an XIXvet kantved ha deroù ar mare Meiji e klaske arme Japan bezañ pourvezet gant armoù-dorn modernoc'h. Nambu en doa klasket e awen en nevezintioù a veze degaset en armoù en Europa d'ar poent-se. Daoust d'un nebeud kemmoù degaset gantañ d'e arm e 1906, ne voe ket dibabet gant an arme japanat hag un nebeud miliadoù anezhe a voe produet nemetken[1].
E 1922 e voe anvet Nambu da jeneral ha lakaet e voe e penn arsanailh Kokura. Adstagañ a reas gant e labour war un doare pistolenn nevez oc'h azasaat e Stumm A evit ma vije aesoc'h da broduiñ. Ar bistolenn nevez-savet a voe dibabet gant an arme japanat e 1925 hag anvet Stumm 14. Ouzhpenn 282.000 skouerenn a voe produet etre miz Du 1926 ha miz Eost 1945 evit isofiserien hag ofiserien an arme hag ar morlu[1]. Evel kalz a armoù-tan japanat e tigreskas kalite produiñ an Nambu 14 adalek 1943 abalamour d'ar mank a zanvezioù kentañ.
Goude ar brezel[kemmañ | kemmañ ar vammenn]
Un arouez-trec'h priziet e oa an Nambu Stumm 14 evit ar soudarded amerikan a stourme e takad-brezel ar Meurvor Habask, evel ma oa al Luger P08 alaman en Europa. Keñveriet e veze alies an div bistolenn[2], met daoust dezhe kaout ur stumm heñvel ez aent en-dro gant gwikefreoù disheñvel.
Meur a skouerenn a voe degaset da Stadoù-Unanet Amerika goude an Eil Brezel-bed. Div anezhe a voe prenet gant William Ruger digant ur soudard amerikan ha servijout a rejont da ziazez evit sevel ar pistolennoù Ruger Standard kentañ.
Implijet eo bet an Nambu 14 da vare ar brezelioù didrevadenniñ en Azia goude ar brezel-bed. Ral eo en Europa met priziet eo gant an dastumerien, er Stadoù-Unanet dreist-holl.
Daveennoù ha notennoù[kemmañ | kemmañ ar vammenn]
- ↑ 1,0 ha1,1 (fr) GUILLOU Luc, Le pistolet Nambu type 14, e La Gazette des armes 572, miz Meurzh 2024, p. 33-41
- ↑ War an dielloù melestradurel a ranke bezañ leuniet gant ar soudarded amerikan a felle dezhe degas trofeoù-brezel d'ar gêr gante e veze deskrivet alies an Nambu 14 evel ul « Luger type japanese automatic pistol ».
