Don't Bother Me
Don't Bother Me eo ar c'hentañ kanaouenn savet, ton ha son, gant George Harrison (1943-2001) evit ar strollad The Beatles.
Ret e voe gortoz betek miz Eost 1965, pa voe embannet an albom Help!, a-raok klevet div oberenn ouzhpenn krouet ha kanet gant Harrison : I Need You ha You Like Me Too Much.
Istorig ar ganaouenn[kemmañ | kemmañ ar vammenn]
Skrivet e voe e miz Eost 1963 gant ar gitarour saoz tra m'edo-eñ e Palace Court Hotel e Bournemouth (Dorset, Bro-Saoz) o tiskuizhañ, hag eñ gwall glañv (un digarez mat da sevel ur sonenn, Don't Bother Me (Roit peoc'h din) an titl anezhi). En e levr[1] e tispleg ar c'hazetenner Steve Turner (1949-) en devoa graet e vennozh Harrison sonaozañ Don't Bother Me evit ma paouezje Bill Harry[2] (1938-) d'e atahinañ diehan o c'houlenn digantañ pegoulz 'ta e vije skrivet ur ganaouenn all gant ar gitarour war-lerc'h Cry for a Shadow[3], bet embannet e... 1961.
Enrollet e voe gant ar strollad en e bezh d'an 11-12 a viz Gwengolo da-heul, da vezañ embannet war o albom With The Beatles d'an 22 a viz Du (a-gevret gant trizek kanaouenn all). Adkemeret e voe ivez war an albom Meet the Beatles! a voe embannet d'an 20 a viz Genver 1964. He c'hlevet a c'heller e-barzh ar film A Hard Day's Night deuet e-maez d'ar 6 a viz Gouere 1964 er Rouantelezh-Unanet.
2:29 he fadelezh e oa bet produet evit al label Parlophone gant produer boas ar strollad, George Martin (1926-).
Levrlennadur[kemmañ | kemmañ ar vammenn]
- Tim Hill, THE BEATLES Quatre garçons dans le vent, Éditions Place des Victoires, miz Here 2008 pajennoù 427-441.
Liammoù diavaez[kemmañ | kemmañ ar vammenn]
- Filmig Don't Bother Me o tiskouez ar pozioù war un dro.
- Don't Bother Me kanet gant an Archantinad Luis Alberto Spinetta.
- Don't Bother Me kanet gant ar Vreizhveuriadez Kamila Thompson.
Notennoù ha daveennoù[kemmañ | kemmañ ar vammenn]
- ↑ L'INTÉGRALE BEATLES Les secrets de toutes leurs chansons, éditions Hors Collection, 1995, pajenn 37.
- ↑ Bet savet ar gelaouenn sonerezh Mersey Beat gantañ d'ar 6 a viz Gouere 1961.
- ↑ Div ganaouenn all a voe krouet gant Harrison kent : In Spite of All the Danger e 1958 a-gevret gant Paul McCartney ha Cry for a Shadow e 1961 a-gevret gant John Lennon.