Timbroù Egipt - Burevioù gall
Pa vez komzet eus “Burevioù gall en Egipt” e ranker kompren aze un ensavadur krouet gant melestradurezh postel ar Frañs ha hini an Egipt evit aesaat an darempredoù hag an eskemmoù kenwerzhel etre an div vro, e dibenn an XIXvet kantved. Aotreet e oa ar postoù gall a embann timbroù ispisial ha gwerzhañ anezho e tiez-post kêrioù Aleksandria ha Porzh-Said.
Burevioù gall en estrenvro a oa diouto e-barzh un nebeud broioù : Sina, Kreta, Turkia, Enez Zanzibar, Siria. Burevioù saoz, rusian, aostriat, italian… a oa digor ivez, hervez ar broioù.
E 1899 eo embannet an timbroù kentañ : ur rummad a driwec’h skouerenn eus un timbr gall boutin doare Sage, soulgarget gant prizioù etre 1 kentim ha pemp lur. An hevelep timbroù - war-bouez anv ar gêr - a veze embannet en Aleksandria koulz hag e Porzh-Said.
Da heul e vo embannet e 1902-03 timbroù ar rummadoù mil anavezet e Bro-C’hall : « Blanc », « Mouchon » ha « Merson », warno anv kerioù Ejipt engravet. Timbroù e gwenneien ha lurioù gall int.
E 1921 eo soulgarget an timbroù gant moneiz an Egipt : “milieme” zo skrivet e-lec’h “centime”, gant ur feur 2.5 kentim o talvezout ur “milieme”. Bez zo soulgargoù disheñvel hervez al lec’h hag an amzer : "4 Mill." (Aleksandria), "4 / Milliemes" (Porzh-Said).
Evit kreñvaat pouez ar moneiz ejipsian e vo duet gant barrennigoù an arouezioù gall war an timbroù embannet e 1925.
E 1927 hag e 1928 ez eus bet advoullet an timbroù kentañ, nemet gant sifroù e moneiz ar vro (eus “3 m” da “250 m”).
E 1930 eo paouezet gant ar frankiz roet da bostoù Bro-C’hall. Timbroù Egipt hepken a vo implijet adalek ar bloaz-se.