Joachim Patinir

Treuziñ ar bed isdouarel (etre 1515-1524), eoullivadur war goad, 103 x 64 (Mirdi ar Prado, Madrid)

Joachim Patinir pe Patenier (1485 e Dinant- 5 a viz Here 1524 en Antwerpen), anavezet ivez dindan an anvioù de Patinier ha de Patiner a oa ul livour hag un tresour flamank eus an Azginivelezh uhel. Ezel e oa eus kouch Antwerpen. Soñjal a reer e oa eontr Henri Bles, hag a oa livour ivez.

Barrek e oa oa Patinir evit a sell ouzh livañ gweledvaoù levezonet gant oberennoù Hieronymus Bosch, enno elfennoù faltazi, koadeier, broioù ijinet, kêrioù ha stêrioù. Patinir a labouras ivez gant Quentin Matsijs ha soñjal a reer e voe livet lodenn eus taolennoù Matsijs gant Patinir. Pa varvas Patinir e reas Matsijs war-dro e vugale.

An arzvarnour Jacques Stiennon a soñj dezhañ e vije bet ganet Patinir e Wallonia, rak hervezañ ez eo arouezius ar reier a weler en daolenn Gweldva Sant Jerom eus rannvro Dinant.

Meneget eo Patinir e Pictorum aliquot celebrium Germaniae inferioris effigies gant Dominicus Lampsonius.

Oberennoù

• An dec'hadenn war-du Egipt', Antwerpen, Koninklijk Museum voor Schone Kunsten
• Sant Jerom en dezerzh, 1515, Pariz, Mirdi al Louvre
• Treuziñ ar bed isdouarel, etre 1515 ha 1524, Madrid, Mirdi ar Prado
• Gweledva gant Sant Jerom, Madrid, Mirdi ar Prado
• Badeziant ar C'hrist, tro 1515, Vienna, Kunsthistorisches Museum
• Treuziñ ar Stiks

Levrlennadur

• Jacques Stiennon, Jean-Patrick Duchesne, Yves Randaxhe, Cinq siècles de peinture en Wallonie, Les éditeurs d'art associés, 1988.[ISBN 287148-0168]

Liamm diavaez

• Joachim Patenier war lec'hienn kêr Dinant