Ferenc Kölcsey

Eus Wikipedia
Mont da : merdeiñ, klask
En hungareg e reer gant Kölcsey Ferenc met dalc'het e vezo da stumm kornôgel urzhiadur an anvioù tud amañ.

Ferenc Kölcsey ar barzh

Ferenc Kölcsey, ganet d'an 8 a viz Eost 1790 e Sződemeter (Hungaria) hag aet da anaon d'ar 24 a viz Eost 1838, a oa ur barzh hungariat, skridvarnour, prezeger ha politikour, anavezet evit bezañ harpet al luskad politikel frankizour en impalaeriezh an Tiegezh Habsburg.

Anavezet ez eo dreist-holl evel skrivagner pozioù kan broadel Hungaria, Himnusz, savet er bloavezh 1823 ha lakaet dindan stumm ur c'han gant Ferenc Erkel e 1844.

Buhez Ferenc Kölcsey[kemmañ | kemmañ ar vammenn]

Ferenc Kölcsey a zo bet ganet e kêr Sződemeter (Săuca e Roumania hiziv-an-deiz). Emzivad pa oa yaouank-flamm, ampechet gant ul lagad dall dre vezañ tapet kleñved ar vrec'h.

Delwenn Ferenc Kölcsey plasenn Batthany ter kêr Budapest

Da 15 vloaz e kej gant Ferenc Kazinczy ur skrivagner hungariat ha setu-eñ o vont eveltañ etrezek implij ur skrivañ adreizhet eus ar yezh hungarek, o krouiñ gerioù nevez hag oc'h adimplij lod all disoñjet evit ma chomfe bev-buhezek an hungareg war an holl dachennoù eus ar vuhez.

Er bloavezh 1809 e voe adkavet Ferenc Kölcsey o vevañ e Pest gant al labour a noter er c'huzul roueel. N'eo ket laouen gant e garg, adkavet e vez e Szatmár oc'h implij e holl amzer o studiañ ar genedoniezh, ar varzhoniezh, ar skridvarn hag o tifenn damkan Kazinczy.