Bann an Alre

Bann an Alre a oa ur rann velestradurel ha lezvarnel e departamant ar Mor-Bihan e Breizh. Krouet e voe gant lezenn an 23 a viz Eost 1790. Setu amañ roll e nav c'hanton:

• an Alre,
• Porzh-Lae, anvet Kanton an Inizi a-wezhoù,
• Kiberen,
• Landevant,
• Lokmaria-Kaer,
• Mendon,
• Pleñver,
• Pleuwigner,
• Plunered.

Lez-varn ar bann

• 1790: dilennet e voe pemp barner ha tri advarner d'ar 4 a viz Here 1790 (pe un tammig diwezhatoc'h) en ur heuliañ al Lezenn eus ar 16 hag ar 24 a viz Eost 1790. Evit kaout gwir da votiñ e ranke ar geodedourien bout pinvidik mat: graet e veze dilennourien an eil derez anezhe, un nebeud degadoù e oant er bann.
• Roll ar varnerien bet dilennet e 1790:
  • kadoriad (barner kentañ): Louis Marie Toussaint Kergrohen,
  • eil barner: Ange Samuel Humphry (tad),
  • trede barner: Louis César Coudé,
  • pevare barner: Corentin Thomas le Corgne de Rosambo,
  • pempvet barner: Jean François Barré Manéguen da gentañ, Charles François Dufeigna da c'houde,
  • kentañ advarner: Christophe Glain,
  • eil advarner: Hyacinthe Marie Frogerays de Saint Maudé,
  • trede advarner: Jacques Joseph le Febvrier,
  • pevare advarner: Charles François Dufeigna, bet lakaet da bempvet barner.

Dilamet ar bannoù

Gant Bonreizh Bloaz III (22 a viz Eost 1795) e voe lamet ar bannoù ha bodet e veze kuzulioù-kanton (ne chome tamm emrenerezh ebet gant kumunioù ar c'hanton).