Adélaïde-Louise d'Eckmühl de Blocqueville
Adélaïde-Louise d'Eckmühl de Blocqueville, bet ganet Adélaïde-Louise Davout d'an 8 a viz Gouere 1815 e Pariz hag aet da Anaon d'ar 6 a viz Here 1892 e Villers-sur-Mer (Calvados, Bro-C'hall), a oa ul lennegourez hag ur varzhez c'hall.
Mont a reas da varkizez e 1835 goude dimeziñ gant ar markiz Edmond-François Pierre de Couliboeuf de Blocqueville (1788-1861). Gwelet e veze e lez Loeiz-Fulup Iañ alies betek mont e mignoniezh gant ar rouanez Maria Amalia.
Goude marv he fried e teuas da vezañ hec'h ostel ur saloñs ma c'halled kejañ gant mondianed ar mare : ar brederourien Elme-Marie Caro ha Victor Cousin, ar skrivagnerien Jules Claretie hag Octave Feuillet, al livour Ingres, ar sonaozer Franz Liszt, an akademiad Thiers, hag all...
Hec'h oberenn gentañ, ar romant Perdita, a voe embannet e 1859 ha heuliet gant un dek bennak all, unan anezhe deuet e-maez war-lerc'h marv ar skrivagnerez.
Merc'h diwezhañ ar marichal Louis Nicolas Davout[1] (1770-1823) e oa Adélaïde, hag en em ouestlañ a reas da enoriñ eñvor ar soudard kozh en devoa kemeret perzh en emgannoù meur Napoleon Iañ.
D'an 2 a viz C'hwevrer 1885 he devoa graet he meno legadiñ tri c'hant mil lur ar mare evit ma vije savet un tour-tan e Sant-Pêr (ur porzh bihan e Penmarc'h, Bro-Vigoudenn), goulennet groñs ganti ma vije roet an anv "d'Eckmühl" d'ar savadur da zont. Kement-mañ a voe diskuliet d'an 9 a viz Kerzu 1892 pa voe anavezet c'hoantoù diwezhañ ar varkizez. Degemeret e voe al legad gant ar Stad c'hall e 1893. Bet kroget al labourioù e penn-kentañ 1894 e voe lidet digoradur Tour-tan Sant-Pêr d'ar 17 a viz Here 1897.
Oberennoù
[kemmañ | kemmañ ar vammenn]- 1859 : Perdita
- 1861 : Chrétienne et Musulman[2]
- 1863 : Le prisme de l'âme : étude
- 1865 : Rome
- 1874 : Les Soirées de la villa des Jasmins (peder levrenn)
- 1879/80 : Le Maréchal Davout, prince d'Eckmühl, raconté par les siens et par lui-même (peder levrenn
- 1884 : Roses de Noël. Pensées d'hiver
- 1885 : Pensées d'un pape (Clément XIV), publiées par la Mise de Blocqueville
- 1887 : Le maréchal Davout, prince d'Eckmühl. Correspondance inédite, 1790-1815. Pologne, Russie, Hambourg
- 1888 : Chrysanthèmes, pensées d'automne
- 1891 : À travers l'Invisible
- 1894 : Pensées et souvenirs
Liamm diavaez
[kemmañ | kemmañ ar vammenn]Notennoù ha daveennoù
[kemmañ | kemmañ ar vammenn]- ↑ Aet da briñs Eckmühl d'ar 15 a viz Eost 1809 da-heul Emgann Eckmühl e Rouantelezh Bavaria d'an 22 a viz Ebrel 1809.
- ↑ Adembannet e 1892 evel Stella et Mohammed, ou Chrétienne et musulman.