Sabotaj

Eus Wikipedia
Mont da : merdeiñ, klask

Ar sabotaj a zo un ober graet a-fetepañs-kaer evit distruj, gwanaat pe disteraat ur benveg evit ma chomfe sac'het pe na vefe ket ken efedus ken. Implijet eo bet an doare ober-se e bed al labour gant micherourien ’zo evit terriñ mekanikoù, da skouer pa ne veze ket aotre da ziskregiñ diouzh e labour evit gounit gwirioù pe kresk paeamant, pe pa veze re ziaes al labour. Graet e vez kalz gant ar ger ivez da vare brezelioù (brezelioù etre broioù, pe brezelioù ekonomikel, pe eneberezh kevredigezhel) evit ober anv eus an oberoù kaset war-raok evit lakaat rouestl ha mesk e-touez an enebourien, pe ar gevezerien, da skouer en ur zistruj kefluskerioù, hentoù-houarn, linennoù tredan... ha kement tra a c'hall lakaat dizurzh en o zouez. Dishañval diouzh ar sponterezh eo ar sabotaj, pa ne glask ket lazhañ tud, na lakaat ar spont da ren. Disheñvel eo ivez diouzh manifestagoù ma vez distrujet traoù en un doare arouezel a-wechoù. Dre vras e chom kuzh ar saboterien ha ne glaskont ket displegañ na brudañ ar pezh a reont. Ober gaou eo ar pal.

Ar ger[kemmañ]

Gant ar ster-se eo tremenet ar ger sabotaj en holl yezhoù ar bed[1]. Moarvat e teu eus ar galleg sabotage (sabot = botez-koad), pe marteze eus an nederlandeg. Diasur eo orin ar ger avat, daoust ma'z eus bet kinniget a bep seurt displegadurioù. E penn kentañ ne dalveze nemet evit disoc'h ul labour graet foeltr forzh, buan ha n'eus forzh penaos. Kevatal e oa neuze da c'herioù brezhonek evel tarvañ, batrouzañ, mordokiñ, kilbouc'hat, porc'hellat...

Sabotaj brezel[kemmañ]

Seurt oberoù a c'hall bezañ kaset da benn pe gant harzerien, pe neuze gant tud en em silet er vro, pe tud o labourat evit an estren. Gant al lezioù-barn brezel e vez lakaet alies ar saboterien da spierien ha ne vezont ket degemer evel brezelourien (ne vezont ket lakaet da brizonidi brezel eta pa vezont paket).

Doareoù nevez[kemmañ]

Gant bed ar stlenneg e vez komzet eus sabotaj ivez pa vez lakaet meziantoù "drouk" pe "brein" da vont e rouedadoù ’zo. Kaoz a zo bet evel-se eus un ober kaset da benn gant ar Stadoù-Unanet a-enep programm nukleel Iran.

Bed an endro[kemmañ]

Evit difenn ha gwareziñ an endro e vez klevet anv eus sabotaj ivez, ha savet ez eus bet ur ger ispisial evit se: ekotaj ur ger kemmesk gant "eko"+"sabotaj".


Notennoù ha daveennoù[kemmañ]

  1. Da vihanañ mar fizier el liammoù etrewiki.