Jito

Eus Wikipedia
Mont da : merdeiñ, klask

An jito (地頭 e japaneg) oa ur c'hargad krennamzerel e Bro-Japan, dreist-holl e pad maread ar shogunerezhioù Kamakura ha Muromachi. An jito a laboure evit ar shogun ha ret e oa dezhañ ober war-dro ha kempenn manerioù, savadurioù ha tachennoù stag ouzh renner ar ranvro (kokushi an aliesañ).

Ar ger "jito" a grogas da vezañ implijet e dibenn ar maread Heian. Implijet e oa evel un anv-gwan e giz "lec'hel". Da skouer un den "jito" (地頭人) a dalvez un dudenn lec'hel pouezus ha levezonus. Diwezhatoc'h ar ger-mañ a voe implijet evit termeniñ un den hag a ra war dro ur maner. Met evit an istorourien arnevez, diaes eo sklaerat perzhioù kozoc'h ar jito da vare Yoritomo, ne anavezer ket awalc'h a-draoù diwar-benn ar maread-mañ.

Ar garg a jito a zo bet lakaet da varead Minamoto Yoritomo hag e penn kentañ dreist-holl e Kanto. E-pad an oadvezh Kamakura, ar jito oa dibabet gant ar Gokenin (gwaz ar shogun), hag a oa e penn an aferioù milourel. Ar jito a laboure war tailhoù, melestradur ha mont en-dro ar manerioù, hag e karg e oa eus an douaroù hag an atantoù stag ouzh ar maner.

Goude brezel an Jokyu, ar shogunerezh a stalias kalz jitoed e Japan ar c'hornog, e lec'h ma oant lakaet e penn douaroù ar re drec'het. Er memes koulz, kalz a Gokeninien, izili eus ar c'hlanioù Otomo ha Mori, a fiñvjas war-zu ar c'hornôg (1221).

Ar sistem jito a zo bet dilezet ha diskaret e dibenn ar XVIvet kantved gant Toyotomi Hideyoshi.

Flag of Japan.svg Porched Japan ha sevenadur Japan – Adkavit ar pennadoù a denn da Japan ha d'e sevenadur.