Timbroù Inizi Fidji

Fidji zo ur vro enezek e Melanezia er Meurvor Habask, war-dro 2 000 km en hanternoz da Zeland Nevez. Dizoloet e voe an inizi gant Abel Tasman e 1643. Bro warezet gant Breizh-Veur e 1870, deuet eo Fidji da vezañ trevadenn ar Rouantelezh-Unanet e 1874. Dizalc’h eo ar vro abaoe 1970 hag embannet e voe ar Republik e 1987.

Embannet e voe timbroù kentañ Fidji d'ar 1añ a viz Gwengolo 1870 gant moullerezh kazetenn ar vro, ar Fiji Times. Timbroù simpl-tre int, hep an disterañ skeudenn, gant ur sifr er c’hreiz. Enebiñ a reas koñsul Breizh-Veur ouzh ar servij ha klask a reas serriñ anezhañ e 1871. Anvet e voe un ofisour ar postoù ofisiel ha serret e voe servij Fiji Times e 1872.

Timbroù a voe embannet gant Rouantelezh Fidji e 1871, warno ur monogramm CR a dalv "Cakobau Rex", anezhañ roue Fidji.

Adembannet e voe an timbroù-se e 1872 hag adimplijet ar re-se gant ar velestradurezh saoz e 1874 gant al lizherennoù V.R. (« Victoria Regina » Rouanez Victoria) dreistmoullet warno.

Timbroù gant tresoù boutin e trevadennoù Bro-Saoz a voe embannet e 1903 (poltred ar roue Edouarzh VII), e 1912-16 (poltred George V). Ar rummad skeudennaouet kentañ a voe embannet e 1938, o kinnig, e-kichen poltred George VI, lec’hioù arouezel ha buhez an inizi : ur pesketour gant un harpon, ur c’hanoe hengounel, keriadenn annezidi, pont Suva….

E 1970 e teuas Fidji da vezañ dizalc'h, un abeg evit lakaat er-maez timbroù gant pennoù ar Roue Cakobau hag ar Ministr Kentañ Kamisese Mara. Ne voe mui gwelet penn ar rouanez Elesbed II e korn pep timbr adalek 1974.

An darn vrasañ eus danvez an timbroù embannet gant Fidji a chom tost ouzh buhez ar vro, hag ur plas ledan a vez roet d’an natur (loened a bep seurt), d’ar sportoù (C’hoarioù Olimpek), da Ouel Nedeleg, da diegezh ar Rouanez Elesbed II…

Levrlennadur

Phillips, Charles J. The Postage Stamps etc. of the Fiji Islands, Stanley Gibbons, 1908.

Liammoù diavaez