Slowdive

slowdive
slowdive, festival Primavera, Barcelona, 2014.
Bro orin	Bro-Saoz
Doare(où)	shoegaze, dreampop, ambient

Slowdive (skrivet gant lizherennoù bihan peurvuiañ) zo ur strollad sonerezh rock hag a oa bet savet e Reading (Bro-Saoz) e 1989. Pemp soner a ya d'ober anezhañ abaoe ar penn-kentañ : Rachel Goswell (kan, gitar, klavieroù), Neil Halstead (kan, gitar), Christian Savill (gitar), Nick Chaplin (gitar boud) ha Simon Scott (taboulinoù, gitar, elektronika). An darn vrasañ eus an testennoù a vez skrivet gant Neil Halstead. Meur a EP o deus savet da gomañs, kent embann teir fladenn shoegaze e deroù ar bloavezhioù 1990 : Just for a Day (1991), Souvlaki (1993) ha Pygmalion (1995). Degemer fall zo bet graet d'o sonerezh a-wechoù, gant ar mediaoù dreist-holl, abalamour ma ne oa ket o stil diouzh ar c'hiz ken – mare ar grunge e oa kentoc'h. En em zispartiet e oa ar strollad war-lerc'h e drede pladenn, p'o doa divizet Savill, Chaplin ha Scott mont kuit. E 2014, naontek vloaz goude, o doa sonet ar pemp soner asambles en-dro war leurenn ar festival Primavera. Da-heul o deus labouret da sevel ur bladenn nevez, anvet slowdive evel ar strollad, ha deuet er-maez e 2017. Brud vat en deus sachet ar strollad ar wech-mañ, ha dre e oberenn ziwezhañ ez eus bet roet ul lañs nevez d'e bladennoù kozh. E 2023 o doa embannet Everything Is Alive, ur bladenn eizh kanaouenn warni. E 2014 hag e 2024 en doa sonet Slowdive e Breizh, e-kichen Sant-Maloù, er festival Hent ar Rock.