Youenn Kervalan

Eus Wikipedia
(Adkaset eus Ronan an Henañ)
Mont da : merdeiñ, klask

Youenn Kervalan eo anv-pluenn Ronan an Henaff (pe Ronan an Henañ), ur skrivagner brezhoneg eus Lokorn.

Romantoù[kemmañ | kemmañ ar vammenn]

Pajenn gentañ golo al levr

Ur romant Dremmoù Arrasate zo bet embannet e 2009 gant embannadurioù Al Lanv : ur Vreizhadez yaouank eus Lokorn a zibab pellaat diouzh he bro. E Bourdel e ra ar studierez anaoudegezh gant ur studier euskarat... Padal ur romant politikel eo Dremmoù Arrasate kentoc'h eget ur romant karantez, un digarez da lakaat ar gaoz war c'houlennoù o sevel e-touez stourmerien Bro-Euskadi : dizalc'hidigezh pe emrenerezh, stourm armet kuzh pe stourm politikel digor ? An istor karantez a gas da brederiañ war un dro diwar-benn peseurt tu e c'hellfe mont ur stourm Breton.

Liammoù Breizh-Euskal Herria a zo danvez boutin a-walc'h e lennegezh Breizh. War ar memes danvez dre vras, ez eus bet embannet ur romant e galleg gant Pierre-Emmanuel Marais : Ne m'appelle pas Lola (emb. Yoran Embanner 2009).

Deuet eo e eil romant er-maez e 2013, e ti Al Lanv adarre : Ar Waremm Vras (316 pajenn). Savet eo al levr en-dro da vuhez Gaid Bozeg, labourerez-douar e tiegezh ar Waremm Vras, e parrez Plogoneg : penaos e oa bet heskinet e skol ar seurezed en abeg d'ar brezhoneg, penaos he doa bevet ul lazhadeg ha palforsadeg spontus kaset da benn er Waremm Vras gant ur skouadron soudarded alaman e 1943, chomet-hi mut war-lerc'h ar gwall daol-se, ha penaos a-benn ar fin e teu skleurenn an esper en-dro pa c'hoarvez dezhi klevout bugaligoù eus skol Diwan o vont e brezhoneg gant ar varc'hadourez madigoù. An danevell-vuhez a ro tro d'ar skrivagner da livañ gant hiraezh an diskar eus al labour-douar a wechall, eus ar sevenadurezh hag ar yezh a yae da heul. "Petra an diaoul a oa c'hoarvezet er vro-mañ evit d'an dud nac'hañ an hêrezh-se, cheñch yezh ha mont da heul ar c'hiz, gallegañ evel tud-kêr ?" (p. 240).

Nevez a-walc'h el lennegezh vrezhonek eo an doare da zisklêriañ euzhennoù an arme nazi (a-hervez, diwar eñvorennoù chomet bev er c'horn-bro) ha da veuliñ taolioù kaer ar Rezistanted.

Skridoù[kemmañ | kemmañ ar vammenn]

Youenn Kervalan en deus embannet traoù evit ar yaouankiz ivez:

  • Burzhud Koad an Dug (An Here, 1987),
  • Telo, Poullig ar Stered (An Here, 1999).

Kontadennoù skrivet gantañ a oa bet troet pe en oksitaneg (Lo Nadal dels chòts, Institut d'estudis occitans, 1987) pe e korseg (U miraculu di Natalé, Scola corsa, 1987).

Barzhonegoù a zeu gantañ ouzhpenn (peurvuiañ er gelaouenn Al Lanv).