Peronouriezh
Ar beronouriezh (spagnoleg : Peronismo), graet anezhañ justisouriezh ivez (spagnoleg : Justicialismo), a zo un emsav politikel Arc'hantina diazezet war mennozhioù Juan Domingo Perón ha re e eil gwreg Eva Perón. Pal pennañ strollad ar re Berón, ar Partido Justicialista (Strollad Justisour), a oa, adalek ar bloavezhioù 40, sevel ar « justis sokial » en Arc'hantina.
Berzet eo bet ar strollad etre taol-Stad 1955 ha 1972. Neoazh e oa levezonus ar justisouriezh er gevredigezh a-bezh (e sindikadoù zo, hag all). Tremen a ra alies ar beronouriezh da emsav « poblelour ». Evit gwir eo diaes-kenañ e dermenañ. Kavet e veze ennañ tud eus an tu-kleiz pellañ (ar montoneros) kenkoulz ha tud eus an tu-dehou pellañ (Jose Lopez Rega).
Koulskoude e c'heller merzout un nebeud mennozhioù a dolp an holl beronourien :
- Kaout ur gouarnamant-kreiz kreñv ha mestronius a-walc'h
- Dieubiñ ar vro diouzh levezonoù estren
- Dibab un « trede hent » etre ar sokialouriezh hag ar gevalaouriezh
- Kevreañ ar vroadelouriezh hag an demokratelezh sokial.
