Johan Hendrik van Dale

Eus Wikipedia
Sauter à la navigation Sauter à la recherche
Delwenn Johan Hendrik van Dale, e Sluis.

Johan Hendrik van Dale, ganet e Sluis d’ar 15 a viz C'hwevrer 1828 ha marvet e Sluis ivez d’an 18 pe d’an 19 a viz Mae 1872, a voe rener skol er gêr-se eus an Izelvroioù ha geriadurour nederlandek. Brudet eo evel aozer ar Groot woordenboek der Nederlandse taal (« Geriadur bras an nederlandeg »), lesanvet Dikke Van Dale (« Van Dale tev»).

E vuhez[kemmañ | kemmañ ar vammenn]

Eus Eeklo e oa tud Van Dale, ur gêr eus Reter Flandrez (e Belgia hiziv). Mont a rejont da chom da Sluis, e Zeeland. Dont a reas Johan Hendrik da vezañ skolaer hag e 1854 e krogas da labourat en e gêr c’henidik, Sluis, evel skolaer pennañ ar skol kentañ derez eno. E 1855 e voe anvet da ziellour kêr ivez. War e amzer vak e skrive pennadoù diwar-benn yezhadur an nederlandeg ha diwar-benn istor lec’hel Sluis.

E 1867 e voe kinniget dezhañ adwelet an Nieuw woordenboek der Nederlandsche taal (« Geriadur nevez an nederlandeg »), savet gant Isaac Marcus Calisch hag e vreur Nathan Salomon Calisch, evit ma vefe adembannet. Asantiñ a reas ha pevar bloaz war-lerc’h e oa echu al labour gantañ. Dre ma oa bet lakaet diaes, alies, gant ar pezh a gave er geriadurioù nederlandek implijet gantañ evel skolaer, e felle da Van Dale kaout termenadurioù resis ha reolennoù sklaer evit implij ar gerioù. Prederiet e oa gant ezhommoù ar skolidi a glaske « petra a dalvez ar ger-mañ-ger ? ».

Krog e oa ar geriadur da zont er-maez, a-dammoù, e 1871. Met a-raok ma oa bet peurembannet e varvas Van Dale, gant ar vrec'h, e 1872. Kaset e voe al labour da benn gant Jan Manhave, a reas ivez war-dro un embannadur all eus ar geriadur-se diwezhatoc’h.

Liammoù diavaez[kemmañ | kemmañ ar vammenn]