ER

Eus Wikipedia
Sauter à la navigation Sauter à la recherche

ER evit Emergency Room e saozneg, a zo ur stirad skinwel amerikan a 15 koulzad, 331 rann a 46 munutenn pep hini bet krouet gant Michael Crichton ha skignet etre an 19 a viz Gwengolo 1994 hag an 3 a viz Ebrel 2009 war rouedad an NBC, National Broadcasting Company.

Skignet eo bet ar stirad gant an anv Urgences e Frañs adalek ar 27 a viz Mezheven1996 war France 2, adskignet war France 4 hag adalek an 30 aviz Du 2014 war TV Breizh hag adalek ar 5 a viz Genver 2015 war HD1.

Orin ar stirad[kemmañ | kemmañ ar vammenn]

Michael Crichton wearing a suit.
Michael Crichton, krouer ar stirad.

E 1974 e skrivas ar skrivagner Michael Crichton ur senario diazezet war e skiant prenet pa oa mezeg diabarzhiad e Frañs en ur servij trummadoù revec'hiet. Ne yeas ket pelloc'h an traoù ha tremen a reas da raktresoù all. E 1990 e embannas ar romant Jurassic Park a voe azasaet evit ar sinema gant Steven Spielberg e 1993. Kenlabouret o doa mat-tre an daou zen. Kinnig a reas neuze Crichton da Spielberg senario ER. Divizet o deus aozañ ur film stur evit ur stirad skinwel kentoc'h eget ur film evit ar sinema. N'eus bet degaset kemm ebet pe dost da skript kentañ Crichton. An dudenn a vo Susan Lewis er stirad a oa ur paotr koulskoude ha ne oa ket Peter Benton un amerikan du.

An istor[kemmañ | kemmañ ar vammenn]

Diskouezet evez er stirad buhez servij an trummadoù en ospital skolveuriek Cook County e Chicago ha, dre astenn, buhez an dud a labour ennañ.

Kalz dodennoù eus ar vuhez a-vremañ, pouezus alies, a vez pledet ganto er stirad, dre buhez ar glañvourien pe, dreist-holl dre vuhez ar vedisined pe labourerien all an ospital. Da skouer : ar seropozitivelezh gant Jeanie Boulet ; an heñvelreviadezh hag ar gwir devit an heñvelrevidi da sevel bugale gant Kerry Weaver ha Maggie Doyle ; ar saviadoù spontus er C'hongo-Kinshasa hag en Darfour ma ya di John Carter evit labourat evit aozadurioù dengarour ; ar vouzarded ha yezh ar sinoù gant Peter Benton ; ar c'hrign-bev gant Mark Greene ; an emlazh gant Carol Hathaway ; an hevarv gant Chen pe c'hoazh brezel Irak gant Michaël Gallant. Alies e teu war wel kudenn sistem surentez sokial ar Stadoù-Unanet.

Koulskoude e vez fent alies dre hanterouriezh tudennoù zo evel Jerry Markovic, paotr an degemer pe an Dr Dave Malucci pe an Dr Romano pe c'hoazh an Dr Archie Morris.

Unan eus perzhioù heverk ar stirad eo an niver a istorioù karantez etre an tudennoù (Doug ha Carol, Peter ha Jeanie, Mark ha Susan, Peter hag Elizabeth, John hag Anna, Mark ha Chuny, John ha Lucy, Luka ha Carol, John ha Susan, Luka hag Abby, John hag Abby, Peter ha Cleo, John ha Kem, Greg ha Jing-Meï, Mark hag Elizabeth, Luka ha Samantha, Neela ha Michael, Neela ha Ray, Neela hat Tony, Neela ha Simon, Samantha ha Tony, hag all...).

Aktourien ha tudennoù[kemmañ | kemmañ ar vammenn]

Er penn-kentañ e kaver Anthony Edwards a c'hoari an Dr. Mark Greene, George Clooney a zo Dr. Doug Ross, Sherry Stringfield a c'hoari Dr. Susan Lewis, Noah Wyle a c'hoari John Carter, studier war ar vezkeniezh, hag Eriq La Salle a zo Dr. Peter Benton.

Goude e voe un toullad kemmoù: ar glañvdiourez Carol Hathaway, c'hoariet gant Julianna Margulies ha glaske emlazhañ e skript ar stur-film a zeuas da vezañ un ezel eus ar skipailh. Ming Na a gaver e kreiz ar c'hentañ koulzad o c'hoari ar studierez Jing-Mei "Deb" Chen ne gaver ket en eil koulzad pa weler Gloria Reuben a c'hoari ar vezegez skoazellerez Jeanie Boulet ha Laura Innes o c'hoari an Dr. Kerry Weaver e eil koulzad.

A-hed an trede koulzad e weler aktourien o kuitaat a re all o tont. Tamm-ha-tamm e voe cheñchet mik ar skipailh diazez. Sherry Stringfield a voe an hini gentañ o kuitaat. Disteiñ a reas eus 2001 betek 2005. Kuitaat a reas George Clooney e 1999 evit c'hoari e filmoù sinema. Julianna Margulies a guitaas ar bloaz war-lerc'h.

E-kerzh an eizhvet koulzad e kuitaas Eriq La Salle pa guitaas Benton "Cook County" hag Anthony Edwards pa varvas Mark Greene eus ur gresken nen e empenn. Noah Wyle a guitaas e-pad ur pennad met a zistroas evit un toullad rannoù e dibenn ar stirad.

Gwelet e voe Goran Visnjic (Dr. Luka Kovač), Maura Tierney (Dr. Abby Lockhart), Alex Kingston (Dr. Elizabeth Corday) ha Paul McCrane (Dr. Robert Romano) oc'h erruout dre ma yae ar stirad war-raok. Er c'houlzadoù diwezhañ e teuas ouzhpenn Mekhi Phifer (Dr. Greg Pratt), Scott Grimes (Dr. Archie Morris), Parminder Nagra (Dr. Neela Rasgotra), Shane West (Dr. Ray Barnett), Linda Cardellini (ar glañvdiourez Samantha Taggart), John Stamos (an diabarzhiad Tony Gates) hag Angela Bassett (Dr. Catherine Banfield).

Ouzhpenn ar strollad boas e weler alies aktourien o c'hoari memes tudennoù pouezus evel labourerien ledvezegel, implijidi zo eus an ospital, klañvdiourezed ha mezeien. Un niver bras a aktourien vrudet a weler o c'hoari klañvourien ur rann pe meur a hini evel "guest stars".