Spisaer (yezhoniezh)

Er yezhoniezh e vez implijet an termen spiser (saoz: modifier pe qualifier) evit komz eus ur ger hag a dalvez da spisaat ur ger all pe ur frazenn.

E brezhoneg e reer un diforc'h etre ar spiserion implijet gant anvioù ma reer "anvioù-gwan" pe "adanvioù" ha raganvioù oute diouzh un tu hag ar spiserion implijet gant gerioù a rummadoù yezhadurel all, dreist-holl verboù anvet "adverboù" pe "rakverboù".

N'eo ket ar spiserion elfennoù kevreadurezhel ret dre ma talvezont nemet da spisaat pe strisaat ster elfennoù all, da skouer:

Reizh e vefe ar frazenn-ma hep ar spiserion (anv-gwan hag adverb), met ne vefe ket reizh ma vefe lamet kuit an anv hag ar verb:

Pennoù mui spiserien:

"Ar c'hi bras a red buan"

Reizh: Pennoù nemetken

"Ar c'hi a red"

Direizh: Spiserion nemetken

*"Bras buan"

E gerioù kevrennek enne un anv-kadarn mui un anv-gwan pe ur verb mui un adverb e reer ivez "penn" ouzh an anv pe ar verb ha "spiser" ouzh an anv-gwan pe an adverb (en o zouez kengerioù), en ur c'hoût e c'hall talvezout un anv-kadarn ivez evit spisaat un anav-kadarn all, da skouer:

Gerioù kevrennek

Anv + anv

"Dourgi"

SPISER ("dour") + PENN ("ki")

Adverb + verb

"Rakprenañ"

SPISER ("rak") + PENN ("prenañ")

Issrannet e c'hell bezañ ar spiserion hervez o lec'h e-keñver an elfenn ma vez spisaet gante. Gant yezhoù zo e vez implijet kentoc'h an eil re pe ar re all:

Rakspiserion: Saozneg

Lec'hiet dirak ar ger spisaet:

"Big boy"

Lostspiser: Brezhoneg

Lec'hiet war-lerc'h ar ger spisaet:

"Paotr bras"

Kemmañ a c'hell ster resis ar spiserion ivez hervez o lec'h, da skouer:

Rakspiser

"Kozh traoù"

Lostspiser

"Traoù kozh"

Gwelit ivez:

• Doareer
• Penn
• Renadur ar penn
• Spisermerkadur