Caradog Prichard

Caradog Prichard (3 a viz Du 1904 – 25 a viz C'hwevrer 1980) a oa ur barzh hag ur romantour kembraek.

Ganet ha maget e voe Caradog Prichard e Bethesda, e kontelezh Gwynedd, e bro ar mengleuzioù mein-glas. Yaouankik e oa pa varvas e dad er vengleuz hag ur c'hleñved spered a oa gant e vamm. E 1923 e voe kaset ar vamm da ospital Dinbych hag eno e tremenas ar rest eus he buhez. Labourat a reas Prichard evel kazetenner, e kembraeg da gentañ hag e saozneg da c'houde, evit Yr Herald Cymraeg e Caernarfon, Y Faner, ar Western Mail e Kerdiz, an News Chronicle e Londrez hag an Daily Telegraph evit echuiñ. E Londrez e tremenas ar braz eus e vuhez.

Oberennoù

Un Nos Ola Leuad eo e romant nemetañ, brudet-mat, embannet e 1961. Kontañ a ra buhez kalet ur paotrig e hanternoz Kembre e deroù an XX^vet kantved. Ar baourentez, ar follentez, an emlazh eo an temoù a gaver el levr-se hag a adkaver en e oberennoù all.

Danevelloù a skrivas ivez ha barzhonegoù. Gounit a reas ar gurunenn en Eisteddfod Vroadel, dre deir gwech, e 1927, e 1928 hag e 1929. Prizioù all a c'hounezas ivez ha tapout a reas ar Gador en Eisteddof 1962 e Llanelli.

• Canu Cynnar, barzhonegoù (1937)
• Terfysgoedd Daear, barzhonegoù (1939)
• 'R wyf Innau'n Filwr Bychan, eñvorennoù (1943), embannet gant an anv-pluenn "Pte P."
• Tantalus, barzhonegoù (1957)
• Un Nos Ola Leuad, romant (1961)
• Llef Un yn Llefain, barzhonegoù (1963)
• YGenod yn ein Bywyd, danevelloù 1964
• Afal Drwg Adda, eñvorennoù (1973)
• Cerddi Caradog Prichard, barzhonegoù (1979)

Troet e voe Un Nos Ola Leuad e meur a yezh, e saozneg, galleg, tchekeg, spagnoleg, alamaneg, gresianeg, nederlandeg, daneg.

Liammoù diavaez

• BBC Cymru - Gogledd Orllewin - "Awdur Un Nos Ola Leuad ac enillydd tair coron a chadair Eisteddfodol" (cy)
• Dictionary of Welsh Biography (en) (cy)