Brezhoneg ar Mor

Eus Wikipedia
Sauter à la navigation Sauter à la recherche
Pajenn gentañ golo al levr

Brezhoneg ar Mor zo titl ul levr gant Loeiz Andouard hag a oa bet embannet gant Hor Yezh e miz Mezheven 1973 da gentañ-penn, a-raok bezañ embannet en-dro e 1983 gant Mouladurioù Hor Yezh.

Al levr[kemmañ | kemmañ ar vammenn]

Ar c'hant c'hwec'h pajenn ha tregont anezhañ a ya d'ober ur geriadur gallek-brezhonek eus geriaoueg ar mor. Skrivet e peurunvan, rummet eo ar gerioù hervez urzh al lizherenneg. Nevezc'her ebet ennañ dre ma ne oa bet dastumet nemet gerioù a veze graet gante gant an dud a vor war ar pemdez. Skeudennaouet eo an oberenn-mañ war-bouez an naontek skeudenn amañ dindan :

  1. Merkoù bezioù kozh e stumm eorioù,
  2. Eorioù kozh hag a-vremañ,
  3. Lestr-balumeta kozh,
  4. Biskinenn eus Konkaven,
  5. Nadoz-vor ar Vretoned,
  6. Bigi kregin war an traezh,
  7. Roued-pesked,
  8. Morskoul,
  9. Sturioù ar bagoù bihan ha bras,
  10. Higennoù,
  11. Goueletenn islandat,
  12. Al lestr-grilhek “Kador”,
  13. Nadoz hag estell,
  14. Anahita,
  15. Gouel gornek,
  16. Bag sardin kozh,
  17. Bag-toun dre lien,
  18. Bag-toun selenner,
  19. Teir-gwern morueta eus Sant-Malo.

Un nebeud stagadennoù a gaver ivez e dibenn al levr : ar Skeul Beaufort (Nerzh an avel), Hentoù ur vag hervez an avel, Anvioù bagoù (hervez ur roll savet gant Kerlannn) ha Gouelioù un teirgwern vark hag he c'herdin-red.