Lizher d'an Hebreed
(Adkaset eus Al lizher d'an Hebreed)
Al lizher d'an Hebreed a zo unan eus Lizheroù Sant Paol hag a gaver en Testamant Nevez.
Rakskrid[kemmañ | kemmañ ar vammenn]
Setu ar pezh a lenner e digoradur Maodez Glanndour d'al lizher d'an Hebreed[1] :
- "Lizheroù sant Paol a ziskouez en o fenn kentañ, ur gasadenn o verkañ fraezh ha sklaer degemererion al lizher. Amañ avat n'hon eus nemet un ano : D'an Hebreed, ano kozh-meurbet moarvat, met ano ha n'emañ ket el lizher e-unan.
- O sellout ouzh an destenn, a zo puilh enni ar soñjoù hag ar c'homzoù tennet eus an Testamant kozh, e teuer da soñjal e vefe bet kaset da Yuzevion kristenaet.
- Hag-eñ ez eus tu da resisaat muioc'h ? Danvez al lizher, gant ar gelennadurezh uhel-se diwar-benn belegiezh hor Salver, a lakfe da soñjal en ur gumuniezh a veleion deuet eus ar Yuzeviezh d'ar C'hrist : santout a reont o feiz o wanaat, rak e-kreiz heskinerezh emaint, hag hiraezh o deus da lidoù kaer an Templ, ken ez int bet temptet da zistreiñ dezhañ.
- Mennad al lizher-mañ a vefe eta o degas en-dro da soñjoù reishoc'h e-keñver ar stad relijiel nevez m'emaint enni gant ar C'hrist."
Pelloc'h e c'heller lenn[2] :
- "Ne zoug al Lizher d'an Hebreed meneg ebet eus un oberour. Hengoun ar Gatolikiezh, oc'h anavezout amañ soñjoù Sant Paol en deus staget al lizher-mañ ouzh e re, en ur anzav war un dro, ez eo bet savet gant un dorn disheñvel diouzh hini an Abostol, rak ne gavomp amañ nag e stumm da frazenniñ, nag e zoare da implijout ar Skriturioù, na netra eus e yezh ken personel.
- Da varn diouzh doareoù al lizher e vezer techet e-touez ar vivliourion a-vremañ da lakaat hor lizher war gont Apolloz (sell. ouzh Oberoù 18, 24-28)."