Timbroù Niue
Emañ enezenn Niue e Meurvor Habask, etre inizi Tonga hag enezeg Cook. Lesanvet Roc’h Polinezia pe ar Roc’h e berr gomzoù, 1653 a dud a oa o chom enni e 2022, Polinezianed anezho dreist-holl.
Etre 1901 ha 1974 e oa bet un tiriad tramor dindan melestradurezh Zeland-Nevez, ha pa ‘z eus bet sinet un emglev gant Auckland e teuas da vezañ ur Stad emren evel an Inizi Cook.
An timbroù kentañ embannet d'ar 4 a viz Genver 1902 a oa timbroù Zeland-Nevez ar mare-se dreistmoullet gant NIUE.. Lenn a reer NIUE PENI ha NIUE TAHA PENI war an timbr a gouste 1 penny.
E 1920 e voe lakaet e gwerzh un heuliad skeudennaouet gant ar meneg NIUE. Amsklaer eo statud an enezenn avat, rak e 1932 e kaver ur rummad skrivet “Niue Cook Islands” warnañ.
Tro 150 timbr hepken a voe embannet etre 1902 ha 1974, pa voe roet an emrenerezh d’an enezenn. Cheñchet eo bet politikerezh melestradurezh ar postoù adalek ar bloavezhioù 1970 avat. Muioc’h mui a rummadoù a denn d’ar ‘’pop-culture’’ etrebroadel a ya d’ober danvez an timbroù : livadurioù, degouezhioù a-bouez familh ar rouanez Elesbed II (eured ha deiz-ha-bloaz ar Priñs Charles, hini e vamm-gozh…), Elvis Presley, Marilyn Monroe, lapoused a bep ouenn, kentrivadegoù sport a bep seurt… Etre 1974 ha 2000 e voe embannet 580 timbr evit un implij war enezenn Niue sañset.
E 1996 ez eus bet krouet an embregerezh Niue Philatelic and Numismatic Company (Embregerezh timbrawourieh ha numismatek Niue) evit ober war-dro an embann timbroù e anv Niue gant melestradurezh Postoù Zeland-Nevez hag hep mar, degas arc'hant da armerzh an enezenn vihan.
E 2011 e voe tamallet ar Postoù da vezañ embannet ur c’houblad timbroù evit enoriñ dimeziñ ar Priñs William ha Kate Middleton : dispartiet e oa ar c’houblad priñsed pa oa disrannet an daou dimbr !