Sevel meskl

Ur peul implijet evit sevel meskl-park, diskouezet en ur saloñs gounezerezh.

Sevel meskl pe ar mesklerezh a zo sevel tri spesad meskl dour mor mat da zebriñ : Mytilus edulis e Norzh Europa (betek Breizh) ha Kanada, Mytilus galloprovincialis war aodoù ar Mor Kreizdouar, Spagn, Portugal hag aodoù Bro-C'hall ar Meurvor Atlantel, ha Mytilus platensis war aodoù Chile.

Doareoù sevel

Meskleg (liester mesklegi) a vez graet eus an takadoù meskl, a c'hall bezañ parkoù graet gant peulioù bras rodellet gant kordennoù e fibr kokoz, plantet en takadoù lec'h ma 'z eus mareoù bras. Lakaet e vez ar munus meskl (meskl yaouank) war ar c'hordennoù. Ret eo dezho bezañ goloet gant ar mor pa 'z eo uhel ar mare. Goude 12-15 miz e c'hallont bezañ dastumet gant ar vesklerien (pa 'z eo izel ar mor).

Implijout nedennerezhioù a zo un teknik all : ur gordenn vras dalc'het war c'horre gant boueoù, ha kordennoù all evit ar munus.

Gant radelloù : kordennoù a zo staget ouzh ar radelloù, a-istribilh a-zerc'h. Kreskiñ a ra ar munus warno.

• 
  Sevel meskl gant nedennerezhioù e Genoù Kotor e Montenegro.
• 
  Ur radell e bambou implijet evit sevel meskl e Abucay er Filipinez.
• 
  Peulioù evit sevel meskl-park e bae Wissant, Pas-de-Calais, Bro-C'hall.
• 
  Un atant meskl e Zeland-Nevez.
• 
  Peulioù e Portland e Maine (SUA).

Istor

Debret e vez meskl gant an dud abaoe miliadoù a vloavezhioù.

Krouet eo bet ar sevel meskl war beulioù e 1235, en Anse de l'Aiguillon (genoù ar Sèvre niortaise) e Poatev, war-lec'h peñse ur beajour iwerzhonat anvet Patrice Walton. Abaoe ar mare-se e vez plantet renkennadoù peulioù koad en aod gant mesklaerion ar c'hornad-bro-se.

Ken bras ha ken tolpet e oa ar meskl e 1950 ma voent distrujet gant ur c'hleñved. Neuze eo e voe klasket lec'hioù all evit sevel ar c'hregin-se. Erruout a reas ar sevel meskl e Bae Sant-Brieg er bloavezhioù 1960 hepken.

Ur park meskl e Richer Zaoulaz (Bro-Leon).

Roadennoù ekonomikel

Ouzhpenn 700 000 tonenn a veskl a vez produet bep bloaz en Europa, gant un digresk ingal abaoe 1999.

Produiñ e tonennoù (2003) Roadennoù FAOSTAT (FAO)
Republik Pobl Sina	683 237	43,0 %	1añ
Spagn	248 827	15,6 %	2l
Italia	100 000	6,3 %	3e
Frañs	68 000	4,3 %	6vet
Stadoù all	489 400	30,8 %	—
Hollad	1 589 464	100 %	—

Produet e vez 68 000 tonenn bep bloaz e Frañs eta, ha bevezet e vez 100 000 tonenn, setu perak e vez enporzhiet ar peurrest eus an Izelvroioù, Iwerzhon ha Spagn.

• 
  Ur gobar dour-ha-douar implijet gant ar vesklerien e Gwiver (Bae Menez-Mikael-ar-Mor, Breizh).
• 
  Ur ravanell meskl e Loch Cairlinn (Norzhiwerzhon).
• 
  Ur vag pesketa meskl e porzh Hörnum, enez Sylt en Alamagn.
• 
  O walc'hiñ meskl en ur feurm e Genoù Kotor e Montenegro.
• 
  Chalant mesklerezhe porzh L'Aiguillon-sur-Mer e Vande.

Lec'hioù produiñ

Europa an Norzh (Mytilus edulis)

Norzh Breizh a zo ul lec'h produiñ pennañ. Meskl-park bae Menez-Mikael-ar-Mor a voe ar produ kentañ eus ar mor da vezañ roet dezhañ un anvadur orin gwarezet (AOG) e Frañs e 2006 (en Il-ha-Gwilen hepken). 17 494 tonenn a voe produet e Norzh Breizh ha 3 500 tonenn e Su Breizh er bloavezh 2015/2016. Brudet eo ivez meskl-park Pennestin.

E Bro-C'hall : Normandi, Bae Somme ha aod Mor an Hanternoz.

• Parkoù meskl e Bro-Sant-Brieg
• 
  E Plevenon.
• 
  E Bae Sant-Brieg.
• 
  E Hilion.
• 
  E Sant-Kast-ar-Gwildoù.
• 
  E Sant-Kast-ar-Gwildoù.

• Parkoù meskl e Norzh Bro-C'hall
• 
  Bae Wissant e Pas-de-Calais.
• 
  Pas-de-Calais.
• 
  Bae Wissant e Pas-de-Calais.
• 
  Munus meskl-park e deroù o c'hresk, e bae Somme.

Europa ar Su hag an aod atlantel (Mytilus galloprovincialis)

E Bro-C'hall eo brudet Charron, e norzh Charente-Maritime. Enez Ré ha Diazad Marennes-Oléron, e Charente-Maritime e zo lec'hioù produiñ all. Brudet e Rías Baixas, e Galiza.

Er Mor Kreizdouar e vez produet meskl e stank Thau.