Luisa Carlotta an Div Sikilia

Luisa Carlota

Luisa de Borbone-Sicilia, pe Luisa Carlotta Maria Isabella di Borbone en italianeg, pe Luisa Carlota de Borbón-Dos Sicilias y Borbón e spagnoleg, ganet e 1804 e Portici, e Rouantelezh an Div Sikilia, ha marvet e Madrid e 1844, a oa ur briñsez italian, deuet da vout infantez Spagn.

He buhez

Merc'h e oa da Francesco Iañ, roue an Div Sikilia, ha d'e bried María Isabel Spagn. C'hoar e oa da Fernando II an Div Sikilia, a renas war-lerc'h o zad, ha da Maria Christina an Div Sikilia (1806–1878). Da gentañ e oa priñsez a Naplez ha priñsez a Sikilia. Hogen, pa voe unvanet Rouantelezh Naplez ha hini Sikilia, d'an 18 a viz Kerzu 1816, eo e teuas da vout priñsez roueel an Div Sikilia.

Spagn

Dimezet e voe e 1819, da 15 vloaz, d'an infant Francisco de Paula Spagn (1794-1865), kont Cadiz, breur d'he mamm ha d'ar roue Fernando VII, ha da Carlos de Borbón (1788-1855), Kont Molina. Evel Europa an amzer-se e oa rannet lez Spagn etre div gostezenn bolitikel:

• en un tu ar virourien touet, ha Kont Molina a oa en o fenn, en sell da vezañ roue war-lerc'h e vreur divugel,
• en tu all ar frankizourien, harpet gant Francisco de Paula ha Luisa.

Ur vaouez a benn e oa, un itrikerez touet, hag un den a bouez bras el lez. Pa varvas trede pried ar roue Fernando VII, he breur-kaer, bepred divugel, e teuas Luisa Carlotta a-benn da lakaat roue Spagn da addimeziñ d'he c'hoar yaouank Maria Christina an Div Sikilia, a deuas da vout pevare pried ar roue intañv.

Dipitet bras neuze e voe Carlos, breur ar roue, o welout e vreur henañ oc'h addimeziñ adarre, hag ar gurunenn o pellaat diouzh e benn ha diouzh hini e bried portugalat.

Rak div verc'h o doe ar rouaned, ha bec'h a voe diwezhatoc'h, ha brezel abalamour da se. Evel-se bepred eo e teuas Luisa da vezañ c'hoar-gaer d'he c'hoar, ha moereb da rouanez Spagn, Isabel II, an hini a renas war-lerc'h Fernando VII, e-lec'h Carlos a chomas e fri war ar gloued. Ouzhpenn-se e timezas he mab Francisco de Asís de Borbón da Isabel II. A-hend-all e oa mamm da Enrique de Borbón, a voe lazhet en un duvell gant Antoine d'Orléans, a oa kenderv da Luisa.

Liammet e oa gant frankizourien Spagn, a-enep kostezenn an infant Carlos hag e bried portugalat, an infantez Maria Francisca.

He bugale

Infant Francisco de Paula hag e bried Luisa Carlotta an Div Sikilia.

E 1819, d'he 14 vloaz, e timezas Luisa Carlotta d'hec'h eontr, an infant Francisco de Paula de Borbón. Unnek bugel o doe:

• Francisco de Asís Luis de Borbón (1820–1821), infant Spagn, kentañ dug Cádiz, marvet da ur bloaz;
• Isabel Fernanda de Borbón (1821–1897), infantez Spagn;
  • dimezet d'ar c'hont Ignacy Gurowski, ha dezho bugale.
• Francisco de Asís de Borbón (1822–1902), infant Spagn, eil Dug Cádiz. Roue kenseurt Spagn
  • dimezet d'e geniterv Isabel II, Rouanez Spagn.
• Enrique de Borbón (1823–1870), infant Spagn, Dug Sevilla, lazhet en un duvell gant Antoine d'Orléans, dug Montpensier.
• Luisa Teresa de Borbón (1824–1900), infantez Spagn,
  • dimezet da José María Osorio de Moscoso y Carvajal, Dug Sessa, ha bugale dezho.
• Eduardo Felipe de Borbón (1826–1830), infant Spagn, marvet da bevar bloaz.
• Josefina Fernanda de Borbón (1827–1900), infantez Spagn ken na zimezas en voranatek da José Güell y Renté, ha bugale dezho.
• María Teresa de Borbón (1828–1829), infantez Spagn, marvet da ur bloaz
• Fernando María de Borbón (1832–1854), infant Spagn,
• María Cristina de Borbón (1833–1902), infantez Spagn,
  • dimezet d'an infant Sebastián Gabriel de Borbón. Pemp bugel he doe, nemet hini ebet ne voe infant Spagn.
• Amalia Filipina de Borbón (1834–1905), infantez Spagn,
  • dimezet d'ar priñs Adalbert Bavaria.

Ur perzh a-bouez bras he doe d'ar mare ma edo ar roue Fernando VII war e dremenvan en 1832. Gouvezet he devoa e oa bet torret dre guzh, gant ar roue, ar Pragmática a oa bet savet da vont a-enep al lezenn salek a denne pep gwir digant ar priñsezed, ha dre-se digant e verc'hed a oa kenitervezed da Luisa Carlotta, evit lakaat an infant Carlos Maria Isidro da bennhêr, setu Luisa Carlotta da c'hervel ar ministr Tadeo Calomarde, abalamour dezhañ da ziskouez ar skrid orin a destenie kement-se. Pa welas ar baperenn e krogas enni, en drailhas, hag en taolas en tan. O welout e klaske ar ministr adtapout an dihell, e roas an Infantez div skouarnad dezhañ hag a zo chomet en istor. Ma lavaras ar ministr, kourtes : -"Señora, manos blancas no ofenden" (Itron, daouarn gwenn ne reont droug").

Goude-se, pareet ar roue, e roas d'e bried kement galloud a oa, ha diwezhatoc'h e teuas da vout rejantez ar rouantelezh. An Infantez e-keit-se a voe bras he levezon war ar roue hag he c'hoar, ar rouanez.

Goude he marv

En 1851 ec'h addimezas da Teresa Arredondo, Dugez San Ricardo, hag ur mab o doe:

• Ricardo María de Arredondo (1852–1872), Dug San Ricardo.