Ar C'hrashoù

Eus Wikipedia
Mont d’ar merdeerezh Mont d’ar c’hlask

Skrivet eo bet ar romant Ar C'hrashoù gant Yann Gerven evit Priz ar Yaouankiz 2008. “Ar C’hrasoù” zo anezhañ lodenn gentañ eus un oberenn e teir levrenn a gas al lennerien e milendall ur bed ha n’eo ket pleustret c’hoazh evit kalz : ar sorserezh e mod ar vro.

Mantret eo sorserezed Kreiz-Breizh – ar re gozh koulz hag ar re a zo c’hoazh er skolaj, hini Rostren da skouer, gant daou wallzarvoud o deus laosket div anezhe war bep a wele ospital. Piv a zo o klask noazañ oute? Kas a reont un enklask war-raok, ouzhpenn an enklask ofisiel renet gant ur strollad archerien, evit esae tostaat ouzh ar wirionez.


Diverradenn[kemmañ | kemmañ ar vammenn]

En deiz a hirie, e Kreiz-Breizh, e-kerzh un nozvezh sabad, ma oa strollet an holl sorserezed tro-dro d'un tantad, e touaras plaen Marielle Goubil, ar pezh ne oa ket kustum d'ober. Mont a reas an holl d'he c'haout neuze ; prenet he doa ur sunerez-poultrenn. Berzh he doa graet a-dra-sur abalamour ma voe gwelet, ur sizhun goude, an hevelep ardivink gant pep gwrac'h.

Pep tra a grogas pa grachas Louise Boudehent gant he mekanik ha dreist-holl, ur miz war-lerc'h pa voe tro Maivon Turdu. Kregiñ a rae ar sorserezed all da gaout aon. E-keit-se n'ez ae ket an enklask ar bolised war-raok daoust dezhe da vezañ bet goulennataet an div sorserez a-benn sklaeraat an afer. E-keit ha ma ma klaskent diskoulmañ ar gudenn e oa ur strolladig danvez-sorserien eus skolaj Rostren, Malo Bleogad, mab-bihan Maivon Turdu, en o zouez o klask kompren. Ur vodadeg a aozjont, un nebeud devezhioù goude, a-benn komz eus ar gwallzarvoud kevrinus o doa kaset Maivon d'an ospital. Ha pep krennard ha mont da ditouriñ gant o mammoù-kozh. Ar re-mañ a oa en em vodet e ti Katrin Chato, unan eus ar c'hoarezed koshañ, a-benn klask kompren ivez.
An deiz war-lerc'h, en archerdi, e kinnige ar jañdarmez, Cindy Denmat ur renta-kont. Lavarout a rae e oa un hailhon en doa graet an taol a-benn adkavout e deñzor bet laosket gantañ e kof ur sunerez bennak. Padal e oa sur Diana hag he mamm-gozh e oa kiriek ar Grec'hmitouarn eus ar fedoù-se. War an hent mat e oa pep hini daoust ma ne oa ken nemet martezeadennoù gante.