Reflets

Reflets zo ur bladenn gant Alan Stivell e 1970. Pladenn gentañ Alan Stivell eo evit e vuhez vicherel, embannet e miz Kerzu 1970, goude ur bladennig gant an delenn geltiek hepken e 1964. Goude bezañ bet brudet er bed folk, dreist-holl a-drugarez d'e arvestoù war leurennoù digor an Hootenanny e Pariz, en doa bet anavezet gant produerien sonerezh. Sinet en doa gant an ti-pladennoù Philips hag embannet evel-se e bladenn gentañ kanet. Merkañ a ra Alan Stivell gant e oberezh-mañ ganedigezh ar “pop keltiek” hag a ro tro dezhañ da skrivañ istor an dekvloaziad-mañ.