Mauser C78
| Mauser C78 | |
|---|---|
 Ur revolver Mauser C78, stumm kentañ da wintañ dre an traoñ | |
| Kinnig | |
| Bro orin | .svg){kind=small} Impalaeriezh alaman
|
| Doare | Revolver un-ober |
| Munisionoù | 7,6 × 20 mm R 9,3 × 25 mm R 10,6 × 25 mm R |
| Produer | Mauser |
| Mare produiñ | 1878-1896 |
| Niver produet | War-dro 3000 |
| Perzhioù teknikel | |
| Mas | 0,930 kg |
| Hirder | 270 mm |
| Hirder ar c'hanol | 135 mm |
| Endalc'h | Taboulin 6 tenn |
| Lezenn | |
| Rummad e Bro-C'hall | D |
Ar Mauser C78 (evit Construktion 1878) zo ur revolver un-ober alaman ijinet gant Paul Mauser e 1877-1878. Lesanvet eo bet Zick-Zack ("kammigell") er broioù alamanek, ha Zig-zag e kalz broioù all, abalamour d'ar rizennoù diavaez war e daboulin[1]. Produet e oa gant an embregerezh Mauser.
Istor ha deskrivadur
[kemmañ | kemmañ ar vammenn]Treut e oa an niver a armoù-dorn a galite etre daouarn ar soudarded eus an daou du da vare ar brezel etre Frañs ha Prusia e 1870-1871. E 1873 e tibabas an arme c'hall ar Chamelot-Delvigne, ur revolver modern, fiziapl ha savet mat. Ar marc'hegerezh alaman a c'houlennas kaout armoù-dorn a seurt-se ivez, hag ur bodad amprouiñ a voe savet adalek 1877 e arsanailh Spandau.
Paul Mauser a ginnigas neuze ar C78, ur revolver disheñvel diouzh ar re anavezet betek-neuze pa veze digoret dre an traoñ evit e adkargañ. Ur c'halibr 10,6 mm hag un daboulin c'hwec'h tenn a oa dezhañ. Rizennoù diavaez an daboulin a servije da lakaat anezhi da dreiñ pa veze stegnet ar c'hi, a-drugarez d'un ibil hag a dape krog er rizenn[2].
Solut e voe kavet an arm gant ar bodad-amprouiñ, met sioù en doa : kizidik e oa rizennoù diavaez e daboulin d'al loustoni, ha luziet e oa e vekanikerezh da sevel ha implijout. Digeriñ ar revolver dre an traoñ evit adkargañ anezhañ ne oa ket akomod-tre ivez. Nac'het e voe neuze an arm e 1879 gant ar bodad-amprouiñ, a gavas gwelloc'h ar Reichsrevolver savet e arsanailh Spandau. Un eil stumm, dezhañ ur framm difiñv, a voe kinniget gant Paul Mauser d'an arme c'hoazh, met nac'het e voe ivez[3].
Mauser a werzhas neuze ar C78 d'ar siviled e tri c'halibr : 7,6 × 20 mm R, 9,3 × 25 mm R ha 10,6 × 25 mm R. Produet e voe betek 1884[2], ha paouezet e voe da vezañ gwerzhet e 1896 pa zeuas ar C96, unan eus ar pistolennoù damaotomatek kentañ, en e blas. Un 3.000 skouerenn bennak eus ar Mauser C78 a vije bet produet hepken, ur pezh ral eo neuze hiziv.
Daveennoù
[kemmañ | kemmañ ar vammenn]- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 127
- ↑ 2,0 ha2,1 (en) SCHREIER Philip, The Classics: Mauser C78 Revolver, Shooting Illustrated, 13/05/2024 (lennet d'an 18/06/2025)
- ↑ (fr) Mauser Zig-Zag, Arme et Passion (lennet d'an 18/06/2025)
