Vz. 52 (karabinenn)
| Karabinenn vz. 52 | |
|---|---|
 Ur garabinenn vz. 52 miret en Armémuseum (Stockholm, Sveden) | |
| Kinnig | |
| Bro |  Tchekoslovakia
|
| Doare | Karabinenn damaotomatek |
| Mont en-dro | Tennata dre amprest gazoù |
| Munisionoù | 7,62 × 45 mm (vz. 52) 7,62 × 39 mm (vz. 52/57) |
| Produerien | Považské strojárne Česká zbrojovka Uherský Brod |
| Mare krouidigezh | 1951-1952 |
| Mare produiñ | 1952 - 1959 |
| Skouerennoù produet | War-dro 1 milion |
| Perzhioù teknikel Vz. 52 / Vz. 52/57 | |
| Mas | 4,14 kg / 4,30 kg |
| Hirder | 1.005 mm 1.205 mm (gant ar vaionetez dibleget) |
| Hirder ar c'hanol | 520 mm |
| Tizh mont e-maez ar boledoù | 760 m/s / 735 m/s |
| Hed-tenn efedus | 650 m / 400 m |
| Endalc'h | Karger fiñv eeun 10 tenn pourveziet gant klipoù |
| Lezenn | |
| Rummad e Bro-C'hall | B |
Ar vz. 52 ("Stumm 52") zo ur garabinenn damaotomatek produet gant Tchekoslovakia evit arme ar vro adalek 1952.
Istor ha deskrivadur
[kemmañ | kemmañ ar vammenn]E-pad an Eil Brezel-bed e voe merzet interest ar c'hartouchennoù etre 7,92 × 33 mm Kurz ha meziad ar fuzuilh-arsailh Sturmgewehr 44 diorroet gant an Alamaned. E Tchekoslovakia, evel e broioù all, e voe klasket gant ijinourien gwellaat ar munision alaman, ha diwar o labour e voe krouet ar 7,62 × 45 mm e deroù ar bloavezhioù 1950, hag ar fuzuilh vz. 52 kambret evitañ.
Evel armoù milourel all eus he mare e rae ar vz. 52 gant kartouchennoù nevez dezhe ur galloud etre, met mirout a rae perzhioù fuzuilhoù bet diorroet a-raok ar brezel, evel ul lamm e koad hag ur vaionetez a c'halled diblegañ. Ur sistem tennata dre amprest gazoù hag ur c'harger fiñv izel e endalc'h (10 tenn) pourveziet gant klipoù he doa[1]. Ar skouerennoù kentañ a voe produet gant Považské strojárne, met abalamour da ziaesterioù e voe fiziet al labour e Česká zbrojovka Uherský Brod, a reas war-dro ur milion skouerenn eus an arm.
E-kreiz ar bloavezhioù 1950 e lakaas an URSS gwask war broioù Pakt Varsovia evit implijout o munisionoù 7,62 × 39 mm, ha rankout a reas Tchekoslovakia en ober adalek 1957, en ur adkambriñ he c'harabinennoù vz. 52, a voe adanvet vz. 52/57 neuze. Adalek 1958 e voe kemeret he flas e arme Tchekoslovakia gant ar fuzuilh-arsailh vz. 58[2].
Karabinennoù vz. 52 a voe kaset d'un nebeud broioù estren, en Angola peurgetket (12.000 skouerenn)[3]. Gwelet eo bet an arm e brezelioù a-vremañ : rebelled a rae gante e brezel diabarzh Siria da skouer[4].
Levlennadur
[kemmañ | kemmañ ar vammenn]- (en) Donald Woolley, The vz. 52 Rifle Series: The Czech vz. 52 and vz. 52/57 Rifles: Their History, Use, and Maintenance, emembannadur, 2024, 132 p., ISBN 978-1034855934
Daveennoù
[kemmañ | kemmañ ar vammenn]- ↑ (en) The Wonderful Czech Vz. 52 Rifle, The Firearm Blog, 15/05/2015 (lennet d'an 18/01/2026)
- ↑ (en) POPENKER Maxim, Vz.52 and Vz.52/57, Modern Firearms (lennet d'an 18/01/2026)
- ↑ (en) GEORGE Edward, The Cuban Intervention in Angola, 1965-1991, Routledge, 2012, 368 p., ISBN 978-0415647106, p. 65
- ↑ (en) Max McGuire, The Syrian Rebels Are Using WHAT? – VZ-52, Second United, 06/08/2016 (diellet)
