Verigar (1919)
Verigar eo anv ar rummad timbroù-post prientet e dibenn 1918 hag embannet e penn-kentañ 1919 e rannvroioù slovenek Stad ar Slovened, ar Groated hag ar Serbed. Ar stad-se a unanas e-pad ur prantad-amzer berr an teir fobl-se eus proviñsoù su Aostria-Hungaria : Slovenia , Kroatia ha Bosnia hag Herzegovina a-vremañ. Asambles gant rouantelezhioù Montenegro ha Serbia e yelo ar stad da vezañ Rouantelezh Serbed, Kroated ha Slovened d’ar 1añ a viz Kerzu 1918.
Moullet e voe an timbroù Verigar e Ljubljana evit bezañ implijet e tiriadoù Slovenia.
Skeudennet e voe un den o terriñ e chadennoù dirak un heol o sevel. E sloveneg e reer gant ar ger veriga evit lavaret "chadenn" ha dre astenn-ster verigar a ra kaoz eus un den chadennet. Alese arouez splann ar pobloù dindan yev impalaeriezh Aostria-Hungaria, deuet a-benn d’en em zieubiñ.
An enskrivadur e kirilleg ("Држава СХС") hag e latin ("Država SHS") a dalvez "Stad ar Slovened, ar Groated hag ar Serbed". Reizh e oa an enskrivadur pa oa bet savet an timbroù, met fazius e oa pa voent embannet e 1919, dre ma oa deuet ar Stad-se da vezañ ul lodenn eus Rouantelezh nevez ar Serbed, ar Groated hag ar Slovened.
Gant al livour sloven Ivan Vavpotič eo bet treset an dresadenn, hag ar jimnast Stane Derganc eo a voe patrom an dresadenn.
Advoullet eo bet an timbroù meur a wech gant moullerien zisheñvel ha diforc'hioù bras a gaver neuze diouzh ar bloaz : paper, kalite ar moullañ, fazioù moullañ, perzh al livioù, kranelladur, h.a.
Un eil embannadur a voe lakaet er-maez e 1920 gant un dresadenn resisoc'h hag un alc'hwez nevesaet.
Sellet e vez ouzh ar strobad timbroù-mañ evel timbroù kentañ Slovenia, daoust ma'z eo meneget er c'hatalogoù dindan an titl Rouantelezh ar Serbed, ar Groated hag ar Slovened pe Yougoslavia.
D'an 19 a viz Meurzh 1993, da-geñver 75vet deiz-ha-bloaz Post Slovenia, e voe adsavet tresadenn Vavpotič war un timbr-post, gant un drekleur livet ha kinklet e livioù ar vro.
Evit lidañ 100vet deiz-ha-bloaz embann timbroù-post Slovenia kentañ e oa bet embannet gant Pošta Slovenije ur follennad 25 timbr, gant ur golo-lizher hag un timbr-post. War an timbr-mañ e weler poltred al livour Ivan Vavpotič hag ur skeudenn eus unan eus an heuliad timbroù Verigar.