Timbroù Benin

Emañ an Dahomey e kornaoueg Afrika, etre Togo, Nigeria, Niger ha Burkina Faso. Trevadennet gant Bro-C’hall e teuas da vezañ ur vro dizalc’h e miz Eost 1960.

Anvet eo bet Benin e 1975.

Trevadenn ar Benin

E 1851 e sinas gouarnamant Bro-C'hall ur feur-emglev a genwerzh hag a vignoniezh gant roue Porto-Novo, Toffa 1añ e anv, anezhañ gwaz roue Glélé an Dahomey. Gant feurioù-emglev 1868 ha 1878 e voe roet rannvro Cotonou da Vro-C'hall. Gant ar soñj en em wareziñ diouzh c'hoantoù ledanaat an Dahomey e voe skoulmet un emglev-difenn nevez etre Frañs ha Porto-Novo e 1883. Pa voe taget Cotonou gant arme ar roue Béhanzin e 1890 e kavas aze Frañs un digarez evit aloubiñ ar vro ha lakaat un termen da rouantelezh an Dahomey. Unvanet e voe trevadennoù gall Porto-Novo ha Dahomey.

E-pad ar prantad amzer berr etre 1892 ha 1894 e voe embannet timbroù an Trevadennoù Gall dreistmoullet gant BENIN ha re ar rummad Navigation et Commerce dindan an anv GOLFE DE BÉNIN.

Dahomey

Adembannet e voe ar rummad diwezhañ-mañ e 1899 gant an alc’hwez DAHOMEY ET DÉPENDANCES, ha war baper liv etre 1901 ha 1905.

Heuilet e voe gant an timbroù a gvemp e-barzh an trevadennoù gall en Afrika : ar Jeneral Faidherbe, ur wezenn-balm, ar Gouarnour Noël-Eugène Ballay (1906-1907) ha diwezhatoc’h Diskouezadeg Etrebroadel Paris (1931), Pierre ha Marie Curie (1938), 150vet Deiz-ha-Bloaz Dispac’h Bro-C’hall (1939)…

Afrika ar c’hornaoueg

Edo Dahomey er framm melestradurel Afrika ar C'hornaoueg C'hall evel ul lodenn vat eus trevadennoù Frañs en Afrika abaoe 1904, ha timbroù gant ar meneg AFRIQUE OCCIDENTALE FRANCAISE pe AOF a voe implijet neuze betek 1960.

E 1941 e teuas er-maez timbroù ispisial a lakae war-wel evit ar wech kentañ broidi an Dahomey, ur geriadenn, al lenn Nokoue... War dimbroù ar rummad kentañ e weler al lizherennoù RF (aet eo ar Republik da get e 1940 koulskoude) e-kichenn DAHOMEY skrivet gant lizherennoù a vent vras. Aet eo an arouez diwar-wel war an eil rummad avat (Difenn an Impalaeriezh) ha war adembannadur skeudenn ar geriadenn "pinvidikaet" gant poltred ar Marichal Pétain...

Republik dizalc’h

D’ar 1añ a viz Eost 1960 e voe embannet dizalc’hidigezh Dahomey ha REPUBLIQUE DU DAHOMEY a voe alc’hwez nevez timbroù ar Stad nevez.

Gant melestradurezh ar Postoù e voe dibabet brudañ herezh ha sevenadur ar vro : artizanelezh, tudennoù (belegez, plac’h yaouank, paotr-saout…), dañsoù hengounel… Degouezhoù zo a voe brudet ivez : abadennoù sport en Abidjan, 160vet deiz-ha-bloaz marv Toussaint Louverture, 18vet deiz-ha-bloaz an UNICEF…

Tra ma oa voe moullet nebeutoc’h eget 200 timbr boutin etre 1960 ha 1974 e voe un tamm diroll ar velestradurezh pa embannas kement a timbroù evit ar postoù dre-nij, a-ratozh evit marc'had an dastumerien kredapl. Bras e oa an timbroù, hag o plediñ gant temoù a blije d’an dastumerien sañset : livadurioù savet gant arzourien Europa, tudennoù istorel Europa pe Amerika (De Gaulle, Napoleon, Louis Blériot), ar C’hoarioù Olimpek…

E 1975 e voe cheñchet anv ar vro a yeas da vezañ BENIN a nevez.