Senklenn (armoù-tan)

Ur senklenn, e bed an armoù-tan, a servij da zougen armoù hiniennel, fuzuilhoù pe karabinennoù peurliesañ. Implijet e vez e bed ar chase, an arme hag an nerzhioù surentez dreist-holl. A-drugarez dezhi e c'hall an tenner disammañ e zivrec'h hag implijout e zaouarn d'ober traoù all. Ur skoazell evit bezañ stabiloc'h da vare ar bukañ e c'hall bezañ ivez. Gellet a ra ar senklennoù bezañ savet gant lêr pe gant danvezioù sintetek (neopren, polyester, polipropilen hag all). Spoue a c'hall bezañ e-barzh evit ma vefe sasunoc'h. E meteier ar chase gwechall, pe en armeoù berr an arc'hant gante c'hoazh (milisoù, nerzhioù nann-gouarnamantel e broioù paour) e c'hall senklennoù an armoù bezañ savet gant danvezioù marc'hadmatoc'h (kordenn pe lien da skouer).

Doareoù senklennoù

Senklennoù simpl, pe "hengounel" (daou boent stagañ) : ar re goshañ ha marc'hadmatañ, stag en un tu ouzh lamm an arm, hag en tu all dindan e fust.
Senklennoù daou boent stagañ quick adjust : ur ruilhenn a gaver war ar senklenn evit reoliañ prim he hirder.
Senklennoù daou boent stagañ evit an tennañ (shooting sling) : ur ruilhenn a gaver e kreiz ar senklenn. Ganti e c'haller reoliañ hirder ar senklenn, pe tennañ en ur mod stabiloc'h, en ur lakaat e vrec'h er vouklenn graet gant ar senklenn etre ar fust hag ar ruilhenn. Ar senklenn stadunanat M1907, bet implijet gant holl armoù-skoaz ar vro e-pad an daou vrezel-bed, eo unan eus ar re anavezetañ. Gant daou damm eo savet^[1].
Ching sling : senklenn staget e tri foent ouzh an arm, diorroet evit meizad ar scout rifle ijinet gant Jeff Cooper. Un doare shooting sling primoc'h hag aesoc'h da implijout eo^[2].
Senklennoù tri foent stagañ : stag eo ar skenklenn e mod un tric'horn ouzh daou benn an arm hag ouzh korf an tenner en ur poent hepken. Evel-se e c'hall an tenner lezel e arm da vont evit ober un dra all, evel tapout krog en un arm-dorn sikour da skouer.
Senklennoù ur poent stagañ : stag eo ar senklenn en ur poent eus an arm hepken. Graet eo ivez evit ma c'hallfe an tenner paouez da gaout krog en e arm hep ne kouezhfe war al leur. Evel ar senklennoù tri foent e vez implijet e metoù an arme pe an nerzhioù-surentez dreist-holl.
Senklennoù doare "sac'h-kein" : graet evit stagañ an arm ouzh kein an tenner, evel ur sac'h-kein. An doare senklenenoù-mañ a vez implijet gant ar soudarded pe ar chaseerien war skioù, hag er biatlon.

Doareoù senklennoù all a zo bet amprouet en Istor, met n'o deus ket graet berzh, evel an affusto d'assalto savet evit ar Villar Perosa italian e deroù an XXvet kantved.

Modoù da stagañ ar senklenn

Gwalennoù biñset e lamm hag e fust an arm eo ar mod hengounel da stagañ ar senklennoù outañ. Kalz armoù modern o dez ur sistem QD (Quick Detach, "Distagañ prim") evit gellet distagañ anezhe prim diouzh o senklenn en ur bouezañ war ur bouton. Sistemoù a seurt-se zo anavezet abaoe pell : fuzuilhoù japanat Arisaka 99 a oa pourveziet gante da vare an Eil Brezel-bed dija^[3].

Skeudennoù

Ur senklenn daouboent stagañ hengounel ouzh ur Marlin Model 25N.
Ur senklenn tri foent stagañ ouzh ur Springfield Armory M1A SOCOM.
Gwalenn Quick Detach evit stagañ ur senklenn ouzh ur SCAR L. Ma pouezer war ar bouton e kreiz ar walenn e tistag anezhi diouzh an arm.