Ruger Mini-14
| Ruger Mini-14 | |
|---|---|
 Ur garabinenn Ruger Mini-14 stumm Government Barrel | |
| Kinnig | |
| Bro |  Stadoù-Unanet Amerika
|
| Doare | Karabinenn damaotomatek Fuzuilh-arsailh (stumm AC-556) |
| Mont en-dro | Tennata dre amprest gazoù, piston berr e red |
| Munisionoù | 5,56 × 45 mm NATO (stumm orin) .222 Remington .223 Remington 7,62 × 39 mm M43 .300 AAC Blackout 6,8 mm Remington SPC |
| Produer | Sturm, Ruger & Co. |
| Mare produiñ | Abaoe 1973 |
| Perzhioù teknikel | |
| Mas | 2,9 kg |
| Hirder (stumm 5816) | 965 mm |
| Hirder ar c'hanol | 330 - 559 mm (etre 13 ha 22 meutad) |
| Lusk-tennañ | 40 tenn/mn Stumm AC-556 aotomatek : 750 tenn/mn |
| Tizh mont e-maez ar boledoù | 990 m/s |
| Endalc'h | Kargerioù fiñv 5, 10 pe 20 kartouchenn |
| Lezenn | |
| Rummad e Bro-C'hall | B |
Ar Mini-14 zo ur rummad karabinennoù damaotomatek (hag aotomatek evit ar stumm AC-556) produet dizehan gant an embregerezh stadunanat Sturm, Ruger & Co. abaoe 1973.
Istor ha deskrivadur
[kemmañ | kemmañ ar vammenn]Adalek 1967 e labouras Leroy James Sullivan ha William B. Ruger evit kinnig ur stumm bihanoc'h ha kambret e .223 Remington eus an M14, a oa neuze an arm servij standart en droadegiezh stadunanat[1]. O fal e oa sevel un arm evit ar siviled koulz hag evit an nerzhioù polis[2]. E 1973 e kinnigjont ur garabinenn damaotomatek a oa heñvel he c'hulasenn-dro ouzh hini an M14, met gant ur sistem tennata dre amprest gazoù simplaet. Marc'hadmat e oa (dindan 200$ pa voe lakaet e gwerzh), simpl ha fiziapl. Abalamour da se e voe lesanvet The poor man's AR-15 (AR-15 ar re baour)[1]. Pourveziet eo ar Mini-14 gant kargerioù 5, 10 pe 20 kartouchenn[3].
Stummoù
[kemmañ | kemmañ ar vammenn]E 1978 e kinnigas an embregerezh Ruger ur stumm e dir disvergl. Adalek 1982 e werzhas ur stumm anvet Ranch, soñjet evit gellet sevel ul lunedenn warnañ, en ur c'hlask tapout marc'had ar siviled war ar maez. E 1986 e voe kinniget ar Mini-30, ur stumm kambret er c'halibr soviedel 7,62 × 39 mm[2]. E 2025 e oa gwerzhet ar stummoù Ranch kambret e 5,56 mm NATO, Tactical (stummoù berroc'h o c'hanol, ha gant lammoù teleskopek pe plegus evit lod) ha Mini-30 (skrivet Mini-Thirty ivez)[4]. Daou stumm a zo bet savet evit bezañ implijet gant nerzhioù gouarnamantel ar Stadoù-Unanet : ar Mini-14 GB (evit "Government Barrel"), dezhañ ul lamm plegus ha peadra da stagañ ur vaionetez outi, hag an AC-556, a ginnig tri mod tennañ : damaotomatek, tri zenn, hag aotomatek.
Implij
[kemmañ | kemmañ ar vammenn]Dont a reas ar Mini-14 da vezañ poblek e-mesk al labourerien-douar hag an dud diwar ar maez er Stadoù-Unanet[3]. Implijet e voe ur Mini-14 gant an torfedour Michael Lee Platt a-enep ajanted an FBI da vare ar fuzuilhadeg e Miami e 1986. Galloud-tennañ uhel an arm a c'hoarias ur roll a-bouez e bilañs ar fuzuilhadeg (2 ajant marv ha 5 gloazet), pa oa pourveziet izili an FBI gant revolverioù 6 tenn evit ar braz anezhe. An darvoud-mañ a gendrec'has an nerzhioù polis er Stadoù-Unanet e oa poent dezhe ober gant pistolennoù ha karabinennoù damaotomatek evit gellet respont d'an dennerien e degouezhioù a seurt-se. Kalz servijoù polis er vro a brenas Mini-14 d'o zro goude an afer-mañ.
Er sevenadur
[kemmañ | kemmañ ar vammenn]- Ar Ruger Mini-14 a c'haller implijout er c'hoari video World of Guns: Gun Disassembly[5].
Gwelet ivez
[kemmañ | kemmañ ar vammenn]Daveennoù
[kemmañ | kemmañ ar vammenn]- ↑ 1,0 ha 1,1 (en) BUCKLES Vincent, Ruger Mini-14 Rifle History, Shooting Times, 23/06/2022 (lennet d'ar 24/07/2025)
- ↑ 2,0 ha 2,1 (en) POPENKER Maxim, Ruger Mini-14, Modern Firearms (lennet d'ar 24/07/2025)
- ↑ 3,0 ha 3,1 (fr) McNAB Chris, Armes à feu Encyclopédie visuelle, L'Imprévu, 2022, p.166
- ↑ (en) Pajenn ar Mini-14 war lec'hienn Ruger (lennet d'ar 24/07/2025)
- ↑ (en) Ruger Mini-14, IMFDB (lennet d'ar 25/07/2025)
