QBZ-95
| QBZ-95 | |
|---|---|
 Ur fuzuilh-arsailh QBZ-95 | |
| Kinnig | |
| Bro |  Republik Pobl Sina |
| Doare | Fuzuilh-arsailh damaotomatek/aotomatek |
| Mont en-dro | Tennata dre amprest gazoù, dre biston berr e red, bullpup |
| Munisionoù | 5,8 × 42 mm 5,56 × 45 mm NATO (QBZ-97) |
| Produer | Norinco |
| Mare produiñ | Abaoe 1995 |
| Mare servij | Abaoe 1997 (arme Sina) |
| Perzhioù teknikel (stumm diazez) | |
| Mas (hep kartouchenn) | 3,25 kg |
| Hirder | 760 mm |
| Hirder ar c'hanol | 463 mm |
| Endalc'h | Karger fiñv eeun 30 kartouchenn Karger fiñv ront 75 kartouchenn |
| Lusk-tennañ | 650 tenn/mn |
| Tizh mont e-maez ar boledoù V0 | 930 m/s |
| Adstummoù | QBZ-97 QBZ-95-1 |
| Lezenn | |
| Rummad e Bro-C'hall | A |
Ar QBZ-95 (sinalunioù : 95式自動步槍; pinyin : 95 Shì Zìdòng Bùqiāng, «fuzuilh aotomatek stumm 95») zo ur fuzuilh-arsailh produet abaoe 1995 gant an embregerezh-stad sinaat Norinco. Arm-skoaz standart e arme Sina e voe adalek 1997.
Istor
[kemmañ | kemmañ ar vammenn]Adalek dibenn ar bloavezhioù 1980 e voe embannet skridoù gant ijinourien sinaat evit mont a-du pe enebiñ ouzh ar meizad fuzuilhoù bullpup. D'ar poent-se edo arme ar vro o klask modernaat he dafar. Daou gentpatrom fuzuilhoù-arsailh bullpup a voe savet : an eil kambret evit ar gartouchenn soviedat 7,62 × 39 mm, hag egile e 5,8 × 42 mm, ur munision nevez diorroet e Sina. Hemañ diwezhañ a voe choazet a-benn ar fin, ha kregiñ a reas al labour evit gwellaat ar c'hentpatrom adalek 1991, dindan renerezh an armeurerien Wang Zhijun ha Duo Yingjian[1].
Lakaet e voe an arm kinniget da standart gant an arme e 1995. Kinniget e voe evit ar wech kentañ en ur mod publik d'ar 1añ a viz Gouere 1997, pa voe roet Hong Kong en-dro da Republik Pobl Sina gant Breizh-Veur[2].
Ar rummad armoù-skoaz QBZ-19 a zo bet savet evit kemer plas ar QBZ-95 adalek 2020[3].
Deskrivadur
[kemmañ | kemmañ ar vammenn]Unan eus ar fuzuilhoù-arsailh skañvañ eus ar bed eo ar QBZ-95. Dibar eo abalamour eo savet tro-dro d'he c'hanol, ha staget eo an elfennoù all outañ[1]. Ur sistem tennata dre amprest gazoù gant ur piston berr e red he deus, ha pourveziet eo gant ur c'harger 30 tenn[2]. He framm zo e polimer, hag ul loc'henn a zo evit dibab tri mod : surded (tenn ebet), damaotomatek pe aotomatek[4].
![](http://br.wikipedia.org/wiki/Restr:Десантирование_участников_конкурса_"Эльбрусское_кольцо"_с_вертолетов_Ми-8_с_последующим_совершением_горного_марша_(18).jpg)
Ur stumm kambret er gartouchenn 5,56 × 45 mm NATO, anvet QBZ-97, zo bet produet adalek 1997. Norinco a werzh anezhañ e mod damatomatek hepken evit ar marc'had sivil ivez[2]. Un eil stumm evit arme Sina, anvet QBZ-95-1,a voe savet adalek 2010-2011, gantañ ur polimer solutoc'h, un dizain dornell nevez, hag ul loc'henn-surded kemmet, pa save homañ kudennoù war ar stumm kentañ[1][2].
Ur fuzuilh-arsailh marc'hadmat eo ar QBZ-95, graet evit bezañ pourveziet a gementadoù uhel d'un arme vras (4.130.000 soudard e 1995[5]), daoust d'ur wikefre diabarzh luziet a-walc'h[1].
Er sevenadur
[kemmañ | kemmañ ar vammenn]An arm pe adstummoù anezhañ a c'haller gwelet e filmoù evel 2012 (sevenet gant Roland Emmerich), hag e c'hoarioù-video evel Call of Duty: Black Ops II ha reoù eus ar rummad Battlefield[6].
Daveennoù
[kemmañ | kemmañ ar vammenn]- 1 2 3 4 (en) China's Assault Rifle: QBZ95, Guns&Ammo, 15/11/2017 (lennet d'an 31/10/2025)
- 1 2 3 4 (en) POPENKER Maxim, Type 95 / QBZ-95 assault rifle (China), Modern Firearms (lennet d'an 31/10/2025)
- ↑ (fr) LAGNEAU Laurent, L’armée chinoise va se doter d’un nouveau fusil d’assaut pouvant se décliner en quatre versions, Opex 360, 19/04/2020 (lennet d'an 31/10/2025)
- ↑ (fr) QBZ-95 (Quing Buqiang Zu), Arme et Passion (lennet d'an 31/10/2025)
- ↑ (fr) Chine - Personnel militaire war Perspective Monde, Skol-veur Sherbrooke, Kebeg (lennet d'an 31/10/2025).
- ↑ (en) QBZ-95, IMFDB (lennet d'an 31/10/2025)
