Prometheus

Vulkan o chadennañ Prometheus, livet e 1623 gant Dirck van Baburen, eus Utrecht (Rijksmuseum).

Prometheus (Προμηθεύς / Promêtheús, da lavarout eo « ar rakwelour » e gregach) a oa un Titan, mab da Japet ha da Temis (pe Klimene hervez oberourien 'zo), ha breur da Atlas, Menœtios hag Epimetheus.

Tad e oa da z-Deukalion, en doa bet gant Pronoia (pe Klimene).

Hervez un doare all eus ar vojenn e vije bet mab d'an doueez Hera ha d'he serc'h, ar Ramz Eurimedon.

Ar vojenn

Krouidigezh Mab-den gant Prometheus (emañ Atena en tu-kleiz), izelvos marmor, Italia, III^e kantved, mirdi al Louvre.

Hervez Teogonia Hesiodos eo Prometheus a grouas an dud diwar un dornad pri hag a gelennas dezho ar goveliañ hag arzoù all. Laerezh a reas tan digant an doueed d'e reiñ d'an dud.