Pierre-François Keraudren

Pierre-François Keraudren, ganet d'ar 15 a viz Mae 1769 e Brest ha marvet d'ar 16 a viz Eost 1858 e Passy, a oa ur skiantour hag ur mezeg breizhat er Morlu gall.

Buhez

Ganet e voe e karter Rekourañs hag e dad a oa surjian er morlu. Echuiñ a reas e studioù lennegel e Kemper, hag e 1782 ez eas da Skol-vezegiezh ar morlu. E 1801 e voe anvet da bennvezeg ha servijout a reas e skouadrenn an amiral Bruix. E 1803 e voe staget ouzh ministrerezh ar Morlu gall ha souten a reas e dezenn doktorelezh e 1804.

Etre 1813 ha 1845 e voe pennenseller Departamant Yec'hed ar Morlu gall, ha kas a reas da benn ul labour efedus hervez e gempredidi. E 1821 e kemeras perzh er bodad enklask anvet gant ar gouarnamant evit enklask war an epidemiezh terzhienn velen he doa skoet start Barcelona.

Keraudren a oa un ezel ouzh Akademiezh c'hall ar vegegiezh, ur c'huzuliadour mezegel evit ar roue gall Loeiz-Fulup Iañ hag un ezel ouzh Kevredigezh Moskva an Naturourien. E-barzh kevredigezhioù mezegel, lennegel ha skiantel e oa, e Madrid, Leuven, Bologna, Orleañs, Marselha, Toulon ha Rochefort.

Mervel a ra e Passy (Bro-C'hall) e 1858, d'an oad a 89 bloaz.

Enorioù

Dont a reas da vezañ marc'heg Urzh Sant-Mikael d'an 10 a viz Gouere 1816^[1], ha komandour Lejion a enor Bro-C'hall d'an 10 a viz Mae 1835.

Ouzhpenn se e voe anvet meur a dra diwar e anv :

Enez Keraudren (Keraudren Island e saozneg), en Aostralia ar C'hornôg.^[2]^[3]
Kab Keraudren, e gwalarn Aostralia^[4] e penn Su "Eighty Mile Beach", un draezhenn 220 km hirder dezhi. Lakaet e voe an anv-se war ar c'hartennoù e 1801 pa oa mezeg ofisiel Ergerzhadeg Baudin en Aostralia etre 1800 ha 1803.
Kab Keraudren e norzh Enez Hunter e gwalarn Tasmania^[5].
« Evn-ar-baradoz Keraudren », ur spesad evned a gaver e Ginea Nevez. Roet e voe e anv skiantel Manucodia keraudrenii gant René Primevère Lesson ha Prosper Garnot e 1826.
Oxygyrus keraudrenii, ur gasteropod anvet gant Charles-Alexandre Lesueur e 1817.
Pterotrachea keraudrenii, ur gasteropod all anvet gant Fortune Eydoux ha Louis François Auguste Souleyet e 1832.

Labourioù

Kenlabourer krouer "Bloazdanevelloù ar yec'hed foran hag ar medisinerezh lezennel" e oa. Embannet en deus kalz pennadoù-skrid e "Geriadur bras ar skiantoù mezegel", hag er "Bloazdanevelloù mor" dindan renerezh Bajot.
Embannadurioù :

Réflexions sommaires sur le scorbut, 1804
Considérations et observations sur la syphilis dégénérée, 1811
De la fièvre jaune observée aux Antilles [et] sur les vaisseaux du roi, Paris, 1823
Mémoire sur les causes des maladies des marins, et sur les soins à prendre pour converser leur santé dans les ports et à la mer, eil emb., Pariz, 1824 (1añ emb., 1817)
Du choléra-morbus de l'Inde ou mordéchi, Pariz, 1824
- Mémoire sur le choléra-morbus de l'Inde, Baillière, Pariz, 1831^[6]
- On the cholera morbus of India, The Lancet Office, Londrez, 1831—"The most rational, unexaggerated, and impartial monograph concerning the Indian Cholera, yet presented to the public" (skrivet war ar rakpajenn)

Gwelet ivez

Beajoù enklask skiantel

Liammoù diavaez

(fr) Diaz-titouroù Léonore, Ministrerezh gall ar Sevenadur (lennet d'ar 07/08/2025)

Daveoù

[1] (fr) Obsèques de M. Kéraudren (lennet d'ar 07/08/2025).

[2] 14°56′33″S 124°41′2″R / -14.9425, 124.68389

[3] Bonzle Digital Atlas – Map of Keraudren Island (2009). Kavet : 07/08/2025.

[4] 19°57′S 119°46′R / -19.95, 119.767

[5] 40°23′S 144°47′R / -40.383, 144.783

[6] France savante dictionnaire prosopographique, Roll an embannadurioù

[1]

[2]

[3]

[4]

[5]

[6]