Panzerschrek

Raketenpanzerbüchse 54; Panzerschrek
	; ; Ur soudard alaman gantañ ur Panzerschrek (1944)
Kinnig
Bro	Trede Reich
Doare	Banner-roketennoù eneptank
Kalibr	88 mm
Mare implij	1943–1945
Perzhioù teknikel; (stumm RPzB 54)
Mas (hep roketenn)	11 kg
Hirder	1640 mm
Hed-tenn efedus	150 m
Tizh o vont e-maez	110 m/s
Adstummoù	RPzB 43; RPzB 54; RPzB 54/1

Arabat eo droukveskañ gant Panzerfaust.

Ar Raketenpanzerbüchse 54 ("Fuzuilh eneptank gant roketennoù 54"), berraet e RPzB 54, ha lesanvet alies Panzerschrek ("Spont an tankoù") zo ur banner-roketennoù eneptank implijet gant armeoù an Trede Reich hag e gevredidi e dibenn an Eil Brezel-bed.

Istor

E deroù an Eil Brezel-bed e oa pourveziet an unvezioù alaman gant armoù eneptank diamzeriet : ar fuzuilhoù evel ar Panzerbüsche 39 ne oant ket efedus a-walc'h evit toullañ an hobregonoù a oa tevoc'h-tevañ, ha re bonner e oa ar c'hanolioù evel ar 5-cm-Pak 38 pe 3,7-cm-Pak 36 evit bezañ diblaset hag implijet buan^[1].

E miz Du 1942, an Alamaned a sezisas ur banner-roketennoù M1 stadunanat goude emgannoù e Tunizia, ha divizet e voe sevel un arm adimplijus heñvel evit dafariñ ar Wehrmacht. Un nebeud kemmoù a voe degaset, ha brasaet e voe e galibr betek 88 mm evit gellet implijout ennañ bannadelloù an 8.8 cm Raketenwerfer 43^[1]. Ober a rae ar Panzerschreck gant ar memes sistem entanañ dre-dan hag ar Bazooka stadunanat^[2].

Ne oa skoed ebet war ar skouerennoù kentañ produet adalek miz Gwengolo 1943, anvet RPzB 43, ha rankout a rae an dennerien bezañ gwarezet gant dilhad ispisial hag ur maskl evit chom hep bezañ devet gant ar gazoù produet goude an tenn, war-hed an daou pe dri metr kentañ red ar roketenn^[2]. Ur skoed a voe ouzphennet neuze evit aesaat implij an arm, a voe anvet RPzB 54. 150 metr e oa e hed-tenn efedus^[1]. Un adstumm berroc'h anvet RPzB 54/1 a voe produet e dibenn ar brezel, dezhañ un hed-tenn gwellaet (180 metr).

War-dro 310.000 Panzerschrek ha 2,2 milion a roketennoù evite a voe produet betek dibenn ar brezel e miz Mae 1945^[1]. Efedus e oa an arm a-enep ar braz eus karbedoù hobregonet ar Gevredidi, pa c'halle toullañ betek 20 cm hobregon.

Ur soudard alaman oc'h amprouiñ stumm kentañ ar Panzerschrek gant dilhad hag ur maskl ispisial evit en em wareziñ diouzh gazoù an darzhadenn.
Soudard alaman o terc'hel ur roketenn eneptank RPzB. Gr. 4322 implijet er Panzerschreck (Ukraina, miz Meurzh 1944).
Soudarded ar rannarme Großdeutschland o prientiñ un tenn (Rusia, 1944).

Implijerien

Daveoù

1 2 3 4 (fr) Maître Luger, RPzB 54 « Panzerschreck » – Le bazooka Allemand, Theatrum Belli, 30/01/2022 (lennet d'an 13/08/2025)
1 2 (fr) Les lance-roquettes, fichenn Mirdi an Arme (Pariz), pellgarget d'an 13/08/2025)

Stag eo ar bajenn-mañ ouzh Porched an Armoù-tan

[:0-1] 1 2 3 4 (fr) Maître Luger, RPzB 54 « Panzerschreck » – Le bazooka Allemand, Theatrum Belli, 30/01/2022 (lennet d'an 13/08/2025)

[:1-2] 1 2 (fr) Les lance-roquettes, fichenn Mirdi an Arme (Pariz), pellgarget d'an 13/08/2025)

[1]

[2]