Oberiadur-brezel Ten-Gō

An hobregoner Yamato e-pad an dagadenn gant kirri-nij stadunanat (7 a viz Ebrel 1945).

Oberiadur-brezel Ten-Gō e voe oberiadur meur diwezhañ Morlu Impalaeriezh Japan da vare an Eil Brezel-bed. E bal e oa kas an hobregoner Yamato, an hini brasañ er bed, asambles gant ur strollad bagoù all, da skeiñ ouzh aodoù Okinawa, evit ma stourmjent a-enep ar soudarded stadunanat dilestret evit aloubiñ an enezenn. Kregiñ a reas d'ar 6 a viz Ebrel 1945. Taget e voe ar flodad listri gant kirri-nij enebour d'ar 7 a viz Ebrel etre Kyūshū hag an inizi Ryūkyū, ha kaset e voe ar Yamato, ha pemp bag all diwar an nav kaset evit e wareziñ, d'ar strad. War-dro 3 700 martolod japanat a gollas o buhez en deiz-se. Kalz skañvoc'h e voe kolloù an US Navy er memes deiz (dek karr-nij ha daouzek levier).