Mauser M1871
| Mauser Modell 1871 | |
|---|---|
 Ur fuzuilh Mauser Modell 1871 kinniget e mirdi an arme e Stockholm (Sveden) | |
| Kinnig | |
| Bro | .svg){kind=small} Impalaeriezh alaman
|
| Doare | Fuzuilh un-tenn (stumm 1871) |
| Mont en-dro | Tennata dre zorn, dre vorailh (adalek ar stumm 1871/84) |
| Munision | 11 × 60 mm Mauser 11 × 37 mm R 10,15 × 63 mm R (Serbia) 7 × 57 mm Mauser (Serbia) 6,5 × 53 mm SR (Uruguay) |
| Produerien | Mauser Steyr |
| Mare produiñ | 1871-1890 |
| Perzhioù teknikel | |
| Mas | 4,5 kg |
| Hirder | 1.350 mm |
| Hirder ar c'hanol | 855 mm |
| Tizh mont e-maez ar boledoù | 440 m/s (11 mm Mauser) |
| Endalc'h | Un-tenn M1871/84 : karger korzennek 8 kartouchenn |
| Lezenn | |
| Rummad e Bro-C'hall | D |
Ar Mauser Modell 1871 eo ar fuzuilh-vorailh gentañ produet gant an embregerezh alaman Mauser. Implijet e voe gant an Deutsches Heer, arme-zouar an Impalaeriezh alaman, adalek 1871, e plas ar fuzuilh Dreyse[1], dindan an anv Gewehr 71 pe Infanterie-Gewehr 71. Kambret e oa evit kartouchennoù metalek 11 × 60 mm R[2]. Karget e veze dre he c'hulasenn. Un-tenn e oa da gentañ[3], met e 1884 e voe ouzhpennet ur sistem pourveziañ dre ur c'harger korzennek 8 tenn dezhi (stumm 1871/84)[4]. Adstummoù berroc'h evit ar marc'hegerezh hag ar Jäger a voe anezhe ivez ; en holl e voe produet war-dro 1,9 milion a skouerennoù eus an M1871 hag eus he adstummoù. Implijet e voe an arm en un nebeud broioù all, Serbia hag Uruguay en o zouez, gant kalibroù disheñvel.
Diamzeriet e teuas ar Modell 1871 da vezañ e-kreiz ar bloavezhioù 1880 gant donedigezh ar poultr divoged hag armoù evel al Lebel gall. Ar Gewehr 88 a gemeras he flas en arme impalaerel alaman adalek 1888, met implijet e voe gant unvezioù alaman zo betek ar Brezel-bed Kentañ.
Levrlennadur
[kemmañ | kemmañ ar vammenn]- (en) WEBSTER COLIN, Argentine Mauser Rifles: 1871-1959, Schiffer Publishing, 2003, 215 p., ISBN 978-0764318689
- (en) GUILLOU Luc, Mauser Rifles Vol. 1: 1870-1918, Schiffer Publishing, 2020, 80 p., ISBN 978-0764360626
Daveennoù
[kemmañ | kemmañ ar vammenn]- ↑ Soudarded Bavaria a rae gant ur fuzuilh all, ar Werder M1869.
- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 114-115
- ↑ (fr) Mauser Mle 1871, Arme et Passion (lennet d'an 01/11/2025)
- ↑ (fr) Mauser Mle 1871/84, Arme et Passion (lennet d'an 01/11/2025)
