Lanchester (pistolenn-vindrailher)
| Lanchester | |
|---|---|
 Ur bistolenn-vindrailher Lanchester Mk. 1 | |
| Kinnig | |
| Bro | .svg){kind=small} Rouantelezh-Unanet
|
| Doare | Pistolenn-vindrailher damaotomatek/aotomatek |
| Mont en-dro | Tennata dre argil |
| Munisionoù | 9 × 19 mm Parabellum |
| Produer | Sterling Armaments Co. |
| Mare produiñ | 1941-1945 |
| Mare implij | 1941–bloavezhioù 1960 (Rouantelezh-Unanet) |
| Pouez ha muzulioù | |
| Mas (hep kartouchenn) | 4,3 kg |
| Hirder | 851 mm |
| Hirder ar c'hanol | 203 mm |
| Perzhioù all | |
| Lusk-tennañ | 600 tenn/mn |
| Hed-tenn pleustrek | 100 m |
| Tizh mont e-maez ar boledoù | 379 m/s |
| Endalc'h | Karger fiñv 32 pe 50 kartouchenn |
| Adstummoù | Mark I Mark I* |
| Lezenn | |
| Rummad e Bro-C'hall | A |
Al Lanchester zo ur bistolenn-vindrailher saoz produet etre 1941 ha 1945, gant ar Sterling Armaments Company dreist-holl. Deveret e voe eus an MP28 alaman gant an ijinour George Lanchester e 1940[1]. D’ar poent-se, goude emgann Dukark, mankout a rae armoù hiniennel d’ar Royal Navy ha d’ar Royal Air Force breizhveurat, a glaskas lakaat sevel ar buanañ ar gwellañ pistolennoù-mindrailher evit gwareziñ o bonoù betegoût e vije aloubet ar vro gant nerzhioù an Trede Reich[2].
Deskrivadur
[kemmañ | kemmañ ar vammenn]Ur bistolenn-vindrailher kambret e 9 mm Parabellum eo al Lanchester, pourveziet gant kargerioù fiñv 32 pe 50 kartouchenn a ranker ensoc’hañ war gostez an arm, evel war ar bistolenn-vindrailher STEN. Ober a ra gant ur sistem tennata dre argil. Ur c'huzh-kanol didoullet zo tro d’he c’hanol evit yenaat anezhañ, hag he lamm e koad zo heñvel ouzh hini ar fuzuilhoù Lee-Enfield a oa e servij e arme Breizh-Veur er memes koulz.
Un arm fiziapl-kenañ e oa al Lanchester abalamour da galite e bezhioù[3], met ker a-walc’h da broduiñ, pa gouste 14£ d'ar mare-se, da lavaret eo pemp gwech koust produiñ ur STEN. Muioc’h a laton hag a zir a ranked kaout d'e ober, ha muioc’h a eurvezhioù labour gant micherourien varrek ivez, ar pezh a oa kudennek da vare ur brezel[2]. George Lanchester a ginnigas tri fimpatrom skañvoc'h nevez e 1942, met rediet e voe da zilezel e labourioù gant ar gouarnamant, ha n'en doa ket c'hoant da bostañ arc'hant pe danvez ouzhpenn er programm[4].
Stummoù
[kemmañ | kemmañ ar vammenn]- Mark 1 (pe Mk. 1) : stumm kentañ, dezhañ modoù tennañ damaotomatek pe aotomatek hag ur c’houch a c’haller reoliañ evit tennoù etre 100 ha 600 yard (war-dro 550 metr) [1];
- Mark 1* (pe Mk. 1*) : stumm simplaet dezhañ ur mod tennañ aotomatek hepken hag ur c’houch evit tennañ etre 100 ha 200 yard[5].
Produerien
[kemmañ | kemmañ ar vammenn]79 790 skouerenn eus an arm a voe produet en holl etre 1941 ha 1943 (pe 1945 hervez an daveoù) gant [5]:
- Sterling Armament Company (merket SA) : 58 900 skouerenn e uzinoù Dagenham (merket S 109) ha Northampton (merket M 619) ;
- W. W. Greener : 16 990 skouerenn, merket M 94 ;
- Boss & Co. : 3 900 skouerenn merket S 156.
Implij
[kemmañ | kemmañ ar vammenn]Servijout a reas al Lanchester er Royal Navy hag e morluioù all eus broioù ar C’hommonwealth, e-pad an Eil Brezel-bed da gentañ, ha betek ar bloavezhioù 1970 e armeoù ‘zo en ur mod ofisiel. Kalz skouerennoù a voe kollet gant ar Royal Navy pa voe aloubet e vagajennoù e Singapour e 1942. Implijet e voe an arm gant unvezioù eus ar Royal Marines e-pad dilestradegoù ar 6 a viz Even 1944 en Normandi. Goude ar brezel e voe roet da unvezioù breizhveurat karget da gontrolliñ an trevadennoù. Etre 1952 ha 1960 e voent implijet evit talañ ouzh emsavadeg ar Mau Mau e Kenya. E 1972 e oa aet an arm diwar implij er Royal Navy, hag e 1979 e voe disklêriet diamzeriet gant Ministrerezh an Difenn da vat[2].
Gwelet ivez
[kemmañ | kemmañ ar vammenn]Levrlennadur
[kemmañ | kemmañ ar vammenn]- (en) HOWROYD David, LAIDLER Peter, Guns of Dagenham: Lanchester,Patchett,Sterling, Collector Grade Publications, 1996, 336 p., ISBN 978-0889352049
Daveennoù
[kemmañ | kemmañ ar vammenn]- ↑ 1,0 ha1,1 (en) POPENKER Maxim, Lanchester Mk. 1, Modern Firearms (lennet d’an 02/06/2025)
- ↑ 2,0 2,1 ha2,2 (en) Lanchester submachine gun: post-WWII use, WWII after WWII, 04/10/2015 (lennet d'an 02/06/2025)
- ↑ (fr) McNAB Chris, Armes à feu Encyclopédie visuelle, L'Imprévu, 2022, p. 214
- ↑ (en) McCOLLUM Ian, Lightweight Experimental Lanchester SMGs, Forgotten Weapons, 14/06/2019 (lennet d'an 02/06/2025)
- ↑ 5,0 ha5,1 (fr) Lanchester, Arme et Passion (lennet d’an 02/06/2025)
