Lahti L-35

Lahti L-35
Ur bistolenn Lahti L-35
Kinnig
Bro	Finland
Doare	Pistolenn damaotomatek, un-ober
Mont en-dro	Tennata dre argil berr
Munisionoù	9 mm Parabellum
Ijiner	Aimo Lahti
Mare ijinañ	1926 - 1935
Produerien	VKT / Valmet Husqvarna Vapenfabriks
Mare produiñ	1935 - war-dro 1985
Mare implij	1935 – bloavezhioù 1980 (Arme Finland)
Perzhioù teknikel
Mas (hep kartouchenn)	1,250 kg
Hirder	237 mm
Hirder ar c'hanol	121 mm
Tizh mont e-maez ar boledoù	350 m/s
Endalc'h	Karger fiñv 8 kartouchenn
Adstummoù	Gwelet ar bajenn
Lezenn
Rummad e Bro-C'hall	B

Al Lahti L-35 zo ur bistolenn damaotomatek ijinet gant Aimo Lahti ha dibabet evel arm-dorn standart gant arme Finland adalek 1935. Ar bistolenn gentañ ijinet ha produet e Finland e voe.

Istor ha deskrivadur

Aimo Lahti, un ijinour hag a laboure evit arme Finland, a dresas e 1929 ur c'hentpatrom pistolenn damaotomatek nevez hag a voe savet gant servijoù teknik an arme e Helsinki. Heñvel e oa neuz an arm ouzh hini al Luger implijet betek-neuze gant arme ar vro, met ur sistem tennata dre argil berr ar c’hanol a oa ganti. Kambret e oa da gentañ evit daou vunision : ar 7,65 mm Parabellum, hag an 9 mm Parabellum. Hemañ a voe choazet evel munision standart nevez an arme, abalamour d’e c’halloud uheloc’h ha d’e implij aesoc’h er pistolennoù-mindrailher. Simplaet e voe ar c'hentpatrom e 1931 evit aesaat ar produiñ a-yoc’h. Goude meur a welladenn all e voe asantet ar bistolenn da vat gant an arme e 1935, dindan an anv Lahti L-35. Amprouet e voe gant soudarded, met meur a rebech a voe graet dezhi, en o zouez he fouez uhel, he draen kalet, hag ar fed e c’halle tennañ an arm e mod aotomatek e-unan.

E miz Even 1935 e tivizas an arme e c’halle bezañ produet an L-35 a-yoc’h, gant ma vije renket he c’hudennoù. Aimo Lahti a zeuas a-benn d’en ober, met n’eo nemet e 1939 e krogas ar produiñ da vat, goude evezhiadennoù all gant ar soudarded, o doa gwelet da skouer e vreine buan plakennoù-lamm koad an arm pa veze implijet e lec’hioù gleb warne erc’h. Diwar neuze e voe pourveziet ar bistolenn gant plakennoù-lamm e bakelit.

Ur c'harger 8 tenn a zo d'al Lahti L-35, hag un ibil da ziskouez ha kambret eo ar munision pe get. Ur pezhig en he c'hulasenn a sikour anezhi da vont en-dro pa vez yen an amzer pe lous an arm. Un nebeud miliadoù a skouerennoù a voe produet en holl hag implijet gant arme Finland, da vare ar Brezel Kenderc'hel dreist-holl.

Adstummoù

Rummad	Mare produiñ	Niver produet (dre vras)	Niveroù-serienn	Evezhiadennoù
0	1938		1006-1104	Evit bezañ amprouet.
1	1939-1941	2600	1100-3700
2	1941-1942	1000	3700-4700
3	1944-1945	2100 betek miz Gwengolo 1944 hag an emglev-peoc'h gant an URSS 1000 etre miz Gwengolo 1944 ha dibenn ar brezel e 1945	3700-6800
4	1945-	2000	6800-9300	Skouerennoù produet evit ar marc'had sivil, dindan an anv Valmet (evit Valmet Oy Tourula, anv nevez an embregerezh)
	1985		50001-50100	Rummad produet evit 50vet deiz-ha-bloaz ar bistolenn

Ezporzhiañ

Ne voe ket ezporzhiet al Lahti L-35 a-yoc'h da vat, met 50 skouerenn a voe gwerzhet da aerlu Sveden e 1940, ha 10 re all da arme Suis e 1943. Ur 600 skouerenn bennak a voe roet da arme Israel etre 1951 ha 1955.

M/40

An embregerezh Husqvarna en deus produet ur stumm un tamm disheñvel diouzh an L-35 evit arme Sveden, brasoc'h e bontig, met hep ibil da ziskouez ha kambret e oa ar munision, nag hep ar pezhig er gulasenn evit aesaat he mont en-dro e koñdisionoù yen. Etre 83950 ha 100.000 skouerenn eus an arm, anvet Husqvarna M/40 pe a-wechoù Lahti L-40, a voe savet etre 1942 ha 1946.

Daveennoù

  Stag eo ar bajenn-mañ ouzh Porched an Armoù-tan