Korovin (pistolenn)
| Pistolenn TK (Toulskiy, Korovina) | |
|---|---|
 Ur bistolenn Korovin | |
| Kinnig | |
| Bro |  URSS
|
| Doare | Pistolenn damaotomatek, un-ober |
| Mont en-dro | Tennata dre argil |
| Munision | 6,35 × 16 mm SR |
| Produerien | Arsanailh Toula |
| Mare produiñ | 1926 - 1935 |
| Mare servij | 1926 - bloavezhioù 1950 |
| Meneger GAU | 56-A-112 |
| Perzhioù teknikel | |
| Mas (hep kartouchenn) | 0,423 kg |
| Hirder | 127 mm |
| Hirder ar c'hanol | 67,5 mm |
| Tizh ar boledoù V0 | 228 m/s |
| Endalc'h | Karger fiñv 8 kartouchenn |
| Lezenn | |
| Rummad e Bro-C'hall | B |
Ar bistolenn Korovin, bet anvet TK en ur mod ofisiel gant nerzhioù surentez an URSS (evit Toulskiy, Korovina, e rusianeg : Тульский, Коровина), zo ur bistolenn damaotomatek un-ober vihan produet etre 1926 ha 1935.
Istor
[kemmañ | kemmañ ar vammenn]_ammo.jpg)
Er bloavezhioù 1920 e fellas da bennoù uhel en URSS lakaat sevel ur bistolenn vihan evit pourveziañ ar boliserien hag an Tcheka. Sergey Korovin, a laboure e arsanailh Toula, en doa echuet e 1923 ur c'hentpatrom pistolenn damaotomatek kambret e 7,65 mm Browning. Dilezet e oa bet gant an aotrouniezhioù abalamour d'he fouez ha d'he friz peurgetket. Dindan atiz an embregerezh sport Dinamo, Korovin a labouras war-lerc'h war ur stumm skañvaet eus an arm, kambret e 6,35 mm Browning[1]. Un arm skañv e oa (war-dro 420 gram), aes da guzhat. Pourveziet e oa gant ur c'harger 8 kartouchenn. Mont a rae en-dro gant ur sistem tennata dre argil[2]. Homañ a voe produet etre dibenn 1926 ha 1935 ha roet d'un nebeud ofiserien, politikourien a renk uhel, hag izili an NKVD war-lerc'h. Roet e voe evel prof ofisiel gant servijoù diplomatiezh ar vro ivez[1][2]. Implijet e voe gant un nebeud ofiserien e-pad an Eil Brezel-bed, ma ne oa ket un arm savet evit brezeliñ da vat zoken.
Ar bistolenn damaotomatek kentañ produet en URSS e oa an TK. Implijet e voe gant un nebeud servijoù Stad betek ar bloavezhioù 1950. War-dro 50 000 skouerenn anezhi a voe graet etre 1926 ha 1935. An Tokarev TT 33 a gemeras he flas adalek kreiz ar bloavezhioù 1930. Un arm ral eo hiziv an deiz[3][4].
Er sevenadur
[kemmañ | kemmañ ar vammenn]Ar bistolenn Korovin a c'haller gwelet en un dornad filmoù ha c'hoarioù video evel Enlisted[5].
Daveennoù
[kemmañ | kemmañ ar vammenn]- ↑ 1,0 ha 1,1 (fr) GUILLOU Luc, 1 - Le pistolet soviétique Tula-Korovin de calibre 6,35 Browning, LAI Publications, 23/11/2024 (lennet d'an 11/03/2026)
- ↑ 2,0 ha 2,1 (en) POPENKER Maxim, Korovin TK, Modern Firearms (lennet d'an 11/03/2026)
- ↑ (en) Rifleman Q&A: Soviet Tula-Korovin Pistol, American Rifleman, 30/06/2020 (lennet d'an 11/03/2026)
- ↑ (en) McCOLLUM Ian, 1926 Tula-Korovin: The First Soviet Semiauto Pistol, Forgotten Weapons, 08/10/2020 (lennet d'an 11/03/2026)
- ↑ (en) Korovin TK, IMFDB (lennet d'an 11/03/2026)
| ||||||||||||||||||||||||||