Kémi Séba

Kémi Séba ("Sterenn Zu" en egipteg kozh), lesanv politikel Stellio Gilles Robert Capo Chichi, zo ur stourmer hollafrikanour gall-ha-beninat ganet e Strasbourg d'an 9 viz Kerzu 1981.

D'e 14 vloaz e 1995 ec'h eas da chom da Rannvro Pariz gant e vamm hag e vreur. Kregiñ a reas da stourm e-barzh Nation of Islam. Kendiazezañ a reas ar Parti Kémite, ur strollad du, e 2002 hag ar vouezh-aotret e voe e-pad daou vloaz. E miz Kerzu 2004 e krouas Tribu Ka, ur strolladig hag a zo e bal difenn ar bobl du. E-kreiz ar gaoz hag ar gwarzh e vez alies er mediaoù. Tamallet e vez dezhañ bezañ gouennelour hag enepyuzev. Divodet e voe ar strollad e 2006 gant ar gouarnamant gall.

Dilojañ a reas da Senegal e miz C'hwevrer 2011. Lakaet eo war ul listenn levezonerien enepgall en Afrika c'hallek gant ar skingomz gall France Info. Dont a reas e 2013 da vezañ ur c'hroniker politikel evit 2sTV, chadenn brevez gentañ ar vro. Kregiñ a reas e vrud da greskiñ en Afrika c'hallek. Kenderc'hel a reas da labourat evit skinweloù all evel Afrique Média Tchad ha VoxAfrica.

Kendiazezañ a reas an AMG Urgences panafricanistes (Urpanaf) gant Toussaint Alain e miz Kerzu 2015. Stourm a ra an aozadur-se war dachenn ar justis sokial, an neveztrevadennouriezh, al Lur CFA, ha goubrenerezh ar Stadoù afrikan liammet gant ar Françafrique.

E miz Gwengolo 2017 e voe argaset Kémi Séba da Vro-C'hall gant ar pennadurezhioù senegalat evit bezañ devet ur bilhed Lur CFA, hag e miz Here ec'h eas d'en em staliañ a Venin.

Beajiñ a reas kalz en Afrika hag er bed evit kejañ gant politikourien, sindikalourien ha stourmerien. Degemeret eo bet e Rusia hag en Iran, div vro hag a sav a-enep "impalaerouriezh ar C'hornôg". E miz C'hwevrer 2018 eo degemeret e Gwadloup gant ar sindikalour Élie Domota. E miz Gwengolo 2018 e voe degemeret en Italia gant al Luskad Pemp Sterenn ha reiñ a reas dezho un teuliad diwar-benn al Lur CFA hag ar Françafrique. Un nebeud mizioù goude e voe fustet Bro-C'hall gant Luigi Di Maio hag Alessandro Di Battista abalamour d'an neveztrevadennouriezh gall en Afrika. Se zo kaoz da dennderioù diplomatek etre an div Stad.

E miz Genver 2018 voe deroet dezhañ an titl a zen politikel afrikat ar bloaz 2017 gant ar chadenn Africanews, war-lerc'h an doktor kongolat Denis Mukwege.

Embannadennoù[kemmañ | kemmañ ar vammenn]

Ma’at Ikh-s Philosophie (2010)
Supra-négritude, arnodskrid, embannadurioù Fiat Lux, 2013, rakskrid gant Grégoire Biyogo (ISBN 979-1091157018)
Black Nihilism, arnodskrid, embannadurioù New African Cultures, 2014 (ISBN 978-2955002902)
Obscure époque, faltazi geopolitikel, embannadurioù New African Cultures, 2016, rakskrid gant Rockin' Squat (ISBN 978-2805203053)
L'Afrique libre, ou la mort, danevell bolitikel, embannadur Groupe CCEE, 2018, rakskridoù gant Biram Dah Abeid, Aleksandr Dougin, Élie Domota, Pedro Biscay, Djimon Hounsou, Ganiou Soglo ha Nicolas Anelka (ISBN 979-1091157292)
Philosophie de la panafricanité fondamentale, Embannadurioù Fiat Lux, 2023 (ISBN 9791091157391)