Julia Lebel-Arias

Julia Arias, anavazet ivez evel Julia Lebel-Arias (Aguilares e proviñs Tucumán, en Arc'hantina, 10 a viz Meurzh 1946) a zo ur c'hoarierez echedoù arc'hantinat, gall ha monakoat.

Mestrez Etrebroadel (WIM) eo abaoe 1985^[1].

Genver 2026: 1 723 eo he renk Elo Standard, 1 688 he renk Elo Fonnapl ha 1 729 he renk Elo Luc'hedenn^[2]. 2 150 eo bet he renk Elo Standard uhelañ^[3].

Buhez

Julia Arias a zo bet ganet en Aguilares d'an 10 a viz Meurzh 1946. P'edo 22 vloaz e krogas da c'hoari ha pleustriñ an echedoù er Stentor Club e Villa Luro. Seizh miz war-lerc'h, e 1968, e kemeras perzh e Kampionad Meurgêr Buenos Aires (+ 6, = 3). Jacobo Bolbochán e voe he mestr kentañ, ha goude-se e kemeras kentelioù gant Oscar Panno. Adalek neuze e ouestlas he buhez d'an echedoù, c'hoari ha kelenn a reas e Klub echedoù Boca Juniors e karter La Boca e Buenos Aires. E 1978 e voe pedet da c'hoari e Tournamant etrebroadel ar Maouezi en Ieras (Okitania). Gallout a reas kemer perzh a-drugarez da skoazell arc'hant Miguel Najdorf, paeet he frejoù karr-nij gantañ. Gober a reas anaoudegezh gant ar c'hoarier gall Patrick Lebel ha dimeziñ a reas gantañ e 1980, dont a reas da vout gall.

Kevezadegoù

Kampionad Meurgêr Buenos Aires

C'hoari a reas e 1968, (+ 6, = 3).
Trec'h e voe e 1972, e 1973 hag e 1974.

Kampionad arc'hantinat ar maouezi

Tapout a reas an eil plas e 1969 e Tucumán war-lerc'h Aída Karguer.
Trec'h e voe peder gwezh : e 1974, e 1975 e Mar del Plata, e 1976 e Buenos Aires hag e 1977^[4].

Kampionad gall ar maouezi

Trec'h e voe teir gwezh : e 1983, e 1986 hag e 1990.

Tournamantoù takadel hag etretakadel ar Maouezi

E 1975 e voe trec'h rampo e Fortaleza (Brasil).
E 1985 e voe trec'h en Amsterdam (Izelvroioù).
E 1985 e voe pemzekvet-c'hwezekvet rampo gant Pepita Ferrer e Zheleznovodsk (Rusia)^[5].
E 1987 e voe trec'h e Budel (Izelvroioù).
E 1987 e voe triwec'hvet e Tuzla (Bosnia-ha-Herzegovina)^[6].

Kevezadegoù all

E miz Meurzh 1988 e voe trec'h, 9,5/11, e Dortmund (Republik Kevreadel Alamagn)^[7].
E 2006, en Arvier (Italia), e kemeras perzh e kampionad ar rummad Henidi S50, tapout a reas an eizhvet plas, 6/11^[8].

Kampionad broioù bihan Europa (Maouezi)

Kemer a reas perzh er 1añ kampionad e miz Du 2022^[9].

Kampionad europat dre skipailh

C'hoari a reas ouzh tablezenn gentañ adskipailh Bro-C'hall e 1997 en eil kampionad e Pula (Kroatia) (+2, =2, -2)^[10].

Olimpiadoù ar Maouezi

C'hoariet he deus e skipailhoù Arc'hantina, Bro-C'hall ha Monako ^[11]^,^[12] :

Bloaz	Tablezenn	Niverenn an Olimpiad (Maouezi)	Bro ha kêr	Disoc'h
1976	1	7	Israel, Haifa	4/10 (+2, =4, -4)
1978	2	8	Arc'hantina, Buenos Aires	6/11 (+4, =4, -3)
1980	2	9	Malta, Valletta	5/12 (+3, =4, -5)
1982	3 (adskipailh)	10	Suis, Luzern	(+5, =2, -1)
1984	2	11	Gres, Thessaloniki	(+4, =5, -4)
1986	1	12	EAU, Dubai	(+4, =2, -6)
1988	2	13	Gres, Thessaloniki	(+4, =3, -3)
1990	2	14	Yougoslavia, Bled	(+3, =2, -6)
2002	2 (adskipailh)	19	Slovenia, Bled	(+2, =1, -4)
2004	(adskipailh)	20	Spagn, Calvià	(+4, =5, -5)
2006	4	21	Italia, Torino	(+4, =0, -4)
2012	3	22	Turkia, Istanbul	(+5, =3, -3)
2014	1	23	Norvegia, Tromsø	(+2, =3, -3)
2016	1	24	Azerbaidjan, Bakou	(+2, =1, -6) ^[13].
2018	4	25	Jorjia, Batoumi	(+2, =2, -5) ^[14].