Hernin

Eus Wikipedia
Mont da : merdeiñ, klask

Hervez e Vita aozet gant Alberzh Veur, e vije deuet Sant Hernin eus Breizh-Veur war-dro 528. Staliet en dije e beniti war douaroù bet roet dezhañ gant an aotrou a Gelenn. Eno e vije aet da Anaon d'al Lun kentañ a viz Mae 535. Lidet e vez e bardon d'ar Sul kentañ a viz Mae e Lokarn.

Skeudennet eo en iliz-parrez Sant-Hern e stumm ur manac'h, ur c'habell war e benn. E manac'h emañ ivez, gant ul levr serr en e zorn, er feunteun gouestlet dezhañ e Lokarn. War e vez e vije bet savet iliz-parrez Lokarn. Un darn eus e relegoù a gaver enni en ur vrec'h relegouer eus ar XVIvet kantved.

E anv en deus roet da Pluhernin (Bro-Wened) (Plebs Huiernin e 833) ha da Sant-Hern (Sancti Hernni war-dro 1330). Sant-paeron ar barrez-mañ eo.

Chapelioù a zo goustlet dezhañ e Plouvagor, Sant-Hern, Skrigneg ha Trefrin.

E anv a zo ur stumm dousaet en -in eus ar ger henvrezhonek hoiarn (houarn).

E ouel a zo d'ar 7 a viz Mae.

Un delwenn anezhañ a gaver e Traoñienn ar Sent e Karnoed.

Mammenn[kemmañ | kemmañ ar vammenn]