Gustav Mahler

Eus Wikipedia
Mont da : merdeiñ, klask

Ur soner eus Aostria a oa Gustav Mahler, bet ganet d'ar 7 a viz Gouere 1860 e Kaliště (er Republik Tchek bremañ) ha marvet d'an 18 a viz Mae 1911 e Vienna. Daoust dezhañ da vezañ bet anavezet evel mestr laz-seniñ eus ar re wellañ, ez eo brudet dreist-holl hiziv an deiz, evel ur sonaozer a bouez bras, e oberennoù o kas ar sonerezh eus dibenn an XIXvet kantved trema ar c'houlz a vremañ. Skrivet en deus dek simfonienn ha meur a rummad lieder, e o zouez Das Lied von der Erde.

Buhez[kemmañ]

Gustav Mahler yaouank

Ganet e oa bet Gustav Mahler d'ar 7 a viz Gouere 1860 e Kalist (Kalischt, Kaliště), e Bohemia. E-pad e vloavezh kentañ e teuas e dud d'ober o annez e Jihlava (Moravia), e-lec'h ma tremenas e vugaleaj. E 1875 e voe degemeret e skol sonerezh Vienna evit deskiñ ar piano gant Julius Epstein. Heuliañ a reas, war ar memes tro, prezegennoù Anton Bruckner e skol-veur Vienna. Das Klagende Lied a oa e wir oberenn gentañ, bet kinniget gantañ evit ur genstrivadeg evel un Opera, aet da ganadeg gantañ un tammig pelloc'h. C'hwitañ a reas an taol arnod-se, ar pezh a lakaas en e soñj mont da vestr laz-seniñ. Goude e gentañ kevrat e Bad Hall, e tapas postoù en operaoù pouezusoc'h-pouezusañ : Ljubljana e 1881, Olomouc e 1882, Kassel e 1884, Praha e 1885, Leipzig e 1886 ha Budapest e 1891. En opera Hamburg e sinas e gevrat hir kentañ e 1891. Chom a reas eno betek 1897. E-pad e vakañsoù hañv, e Steinbach-am-Attersee, e krogas en-dro gant ar sonaozañ. Kas a reas e simfonienn gentañ da benn hag e Lieder aus « Des Knaben Wunderhorn » ivez.


Bet savet er yuzeviezh, e troas Mahler ouzh ar feiz katolik e 1897 a-benn tapout post rener-arz opera mil anavezet Vienna a oa berzet d'ar Yuzevien evit gwir. Chom a reas dek vloaz e Vienna hag eno e prenas e vrud a beurliper. E-pad ar mare-se, pebeilet gantañ prantadoù laz-seniñ nav mizvezh ha sonaozañ ar peurrest eus ar bloaz, peurliesañ e Maiernigg, e-lec'h m'en doa un ti bihan war vord ar Wörthersee, e savas e simfoniennoù, eus an eil betek an eizhvet.

Fortuniañ a reas gant Alma Schindler (1879-1964) e 1902 ha div verc'h en doe ganti, marvet an henañ e 1907. D'ar memes bloaz e klevas e oa klañv e galon hag e kollas e labour e Vienna, taget ken e oa er c'hazetennoù, enepyuzev evit an darn vuiañ, daoust dezhañ bezañ klasket difenn e oberennoù dezhañ.

E 1910, aon gantañ bezañ kuitaet gant e wreg, ez eas da vizitañ Sigmund Freud hag e rannas kaoz gantañ e-pad peder eurvezh. Ar gaozeadenn-se a gasas anezhañ da bareañ. Skrivañ a reas d'e wreg "…Laouen on. Diviz interesus…"

Daoust dezhañ bezañ degemeret mat a-walc'h e bedervet simfonienn, e voe ret dezhañ gortoz 1910 evit kejañ gant e wir bublik, gant e eizhvet simfonienn. Biskoazh ne voe sonet e-pad e vuhez e oberennoù savet da c'houde.

Gustav Mahler e 1909

Taget kreñvoc'h-kreñvañ gant ar re enepyuzev, e resevas ur c'hinnig a-benn ren ar Metropolitan Opera e New York. Kas a reas al laz-seniñ e-pad ur prantad, e 1908 a-raok bezañ skarzhet evit lezel ar plas da Arturo Toscanini. Distreiñ a reas da New York bloaz war-lerc'h evit kas Laz-seniñ New York. D'ar c'houlz-se e peurechuas Das Lied von der Erde kement hag e navet simfonienn, e oberenn glok diwezhañ. E-pad e weladenn ziwezhañ d'ar Stadoù Unanet e voe skoet klañv fall hag e c'houlennas distreiñ da Vienna, e-lec'h ma varvas d'an 18 a viz Mae 1911. Ar ger diwezhañ a zistagas, e viz o tiskouez ul laz-seniñ ijinet gantañ, a voe "Mozart !".

Beziet eo bet e bered Grinzing, en 19vet arondisamant kêr-benn Aostria.

Sonerezh Gustav Mahler[kemmañ]

Oberennoù[kemmañ]

Simfoniennoù[kemmañ]

Oberennoù kanañ[kemmañ]

Sonerezh kambr[kemmañ]

  • Klavierquartett (pevarad gant piano), savet e 1876.

Gwelet ivez[kemmañ]

Listenn ar sonaozourien