Gewehr 88
Arabat eo droukveskañ gant Gewehr 98.| Gewehr 88 | |
|---|---|
 Ur fuzuilh Gewehr 88 kinniget e mirdi an arme e Stockholm (Sveden) | |
| Kinnig | |
| Bro | .svg){kind=small} Impalaeriezh alaman
|
| Doare | Fuzuilh |
| Mont en-dro | Tennata dre zorn, dre vorailh |
| Munision | 8 × 57 mm Mauser (stumm M/88 da gentañ ; stumm Spitzer adalek an 88/05) 7 × 57 mm Mauser (stumm ezporzhiet da Vrazil) |
| Produerien | Ludwig Loewe & Co. C.G. Haenel ŒWG Arsanailh Amberg Arsanailh Dantzig Arsanailh Erfurt Arsanailh Spandau Arsanailh Hanyang |
| Mare produiñ | 1888-1899 |
| Pouez ha muzulioù | |
| Mas | 3,9 kg |
| Hirder | 1.245 mm |
| Hirder ar c'hanol | 740 mm |
| Perzhioù all | |
| Tizh mont e-maez ar boledoù | 620 m/s (M/88) 868 m/s (7,92 mm gant boledoù Spitzer) |
| Endalc'h | Karger diavaez pourveziet gant klipoù 5 kartouchenn |
| Lezenn | |
| Rummad e Bro-C'hall | D |
Ar Gewehr 88, pe Kommissiongewehr, zo ur fuzuilh tennata dre zorn implijet gant an Deutsches Heer, arme-zouar an Impalaeriezh alaman, adalek 1888.
Istor ha deskrivadur
[kemmañ | kemmañ ar vammenn]E 1887 e voe choazet gant an arme c'hall ur fuzuilh standart nevez, al Lebel, hag a denne kartouchennoù enne ar poultr divoged ijinet gant ar Gall Paul Vieille e 1884. Diamzeriet e teuas da vezañ ar Mauser M1871 implijet en arme alaman betek neuze, hag urzh a voe roet da sevel un arm nevez. Savet e voe gant an armeurer Louis Schlegelmilch hag amprouet e 1888 gant ar GPK (GewehrPrufungsKomission, Komision Amprouiñ ar Fuzuilhoù, ur bodad ofiserien hag a laboure e arsanailh Spandau[1]. D'an 20 a viz Du er bloavezh-se e voe choazet da vat evit an arme gant ar c'haiser Wilhelm II[2][3].
Ar Gewehr 88 a oa dezhi ur c'harger hag a c'halle degemer ur c'hlip 5 kartouchenn M/88. Un arm-tennata dre vorailh e oa. Awenet e oa he c'hulasenn gant hini ar Mauser M1871 ha kopiet e oa rizennoù e ganol diwar reoù al Lebel gall. Ur wech boulc'het ar produiñ ha kroget e implij gant ar soudarded e teuas kudennoù war-wel. Ne oa ket fiziapl e garger[2], ha bresk e oa e ganol : frailhoù a zeue war-wel war kalz skouerennoù, ha tarzhañ a rae an arm a-wechoù memes. Kement-mañ a zeue eus ar fed ne oa ket ket raksoñjet mat galloud ar munision implijet en arm[4].
Ur gabal enepyuzev a savas e metoù an tu dehoù pellañ alaman, a embanne e oa siek an armoù a ratozh-kaer dre faot perc'henned yuzev an embregerezh Loewe, a oa e-touez produerien ar Gewehr 88. Judenflinte ("Fuzuilh yuzev") e voe lesanvet an arm gante[3].
Un nebeud kemmoù a voe degaset evit renkañ ar c'hudennoù : kemmet penn ar gulasenn, ouzhpennet un toullig da skarzhañ an aezhennoù ma tarzhe an douilhez, cheñchet stumm ar c'hanol hag adtreset e rizennoù. Ar skouerennoù kemmet pe nevez-produet a zo merket gant al lizherennoù Z pe n.m. (Neues Material)[2].
Ne chomas ket pell ar Gewehr 88 fuzuilh standart an droadegiezh alaman, pa voe kemeret he flas en ur mod ofisiel e 1898 gant ar Gewehr 98. Chom a rae kalz skouerennoù anezhi e servij e deroù an XXvet kantved memestra, ha pa voe kemmet ar gartouchenn M/88 en ur lakaat ur boled begek (Spitzer) dezhi e 1902 e voe divizet azasaat ar Gewehr 88 a chome evit ar gartouchenn nevez, brudet bremañ dindan an anv 7,92 × 57 mm Mauser. Boulc'het e voe adalek 1905, ha Gewehr 88/05 a anver ar skouerennoù-mañ. Al lizherenn S a zo engravet warne. Ur stumm diwezhañ, anvet Gewehr 88/14, a voe produet e deroù ar Brezel-bed Kentañ. Heñvel a-walc'h eo ouzh an 88/05 met izeloc'h e galite[1].
Ur stumm karabinenn, berroc'h, a voe savet diwar ar Gewehr 88, hag anvet Karabiner 88. Kemmet e voe ivez evit degemer ar munisionoù 7,92 mm nevez e 1903[5].
War-dro 2.000.000 a skouerennoù eus ar Gewehr 88 a voe produet en holl[1]. Implijet e voe en Alamagn betek 1945 etre daouarn ar Volksturm. Kalz kopiennoù eus an arm a voe produet e arsanailh Hanyang, e Sina. Turkia a savas ivez he stumm anezhañ. Ur stumm kambret e 7 × 57 mm a voe ezporzhiet da Vrazil. Implijet e voe e kalz broioù all, en o zouez Republik Iwerzhon da vare he ganedigezh[6].
Levrlennadur
[kemmañ | kemmañ ar vammenn]- (en) SCARLATA Paul S., A Collector's Guide to the German Gew. 88 "Commission" Rifles and Carbines, Andrew Mowbray Inc., Publishers, 2007, 215 p., ISBN 978-1931464307
Daveennoù
[kemmañ | kemmañ ar vammenn]- ↑ 1,0 1,1 ha1,2 (en) POPENKER Maxim, Rifle Gew.88 ("Gewehr modell 1888") or "Komissiongewehr" (Commission rifle) (Germany), Modern Firearms (lennet d'an 11/06/2025)
- ↑ 2,0 2,1 ha2,2 (fr) Gewehr Mle 1888, Arme et Passion (lennet d'an 11/06/2025)
- ↑ 3,0 ha3,1 (en) FIRESTONE Adam, HARDIN John, The Model 1888 Commission Rifle, Texas Trading Post (lennet d'an 11/06/2025)
- ↑ (fr) HOUSTON Rob, STROYAN Christine (renerezh), Armes à feu de légende, Larousse, 2019, p. 145
- ↑ (fr) Karabiner 88, Arme et Passion (lennet d'an 11/06/2025)
- ↑ (en) SCARLATA Paul, Firearms of the Irish Civil Wars: Part 2 the Republicans, Shotgun News, 20/08/2009 (lennet d'an 11/06/2025)
