Filigran

Anvet eo filigran pe merk-dour (saozneg watermark) ar skeudenn pe an tres war baper a zeu war wel gant sikour ur gouloù treuzkaset a-dreuz, abalamour da gemmoù e tevder pe stankter ar paper. Implijet eo bet merkoù-dour war timbroù-post, paperoù-moneiz ha teulioù all ar gouarnamant evit mirout ouzh tud dizonest da voullañ reoù faos.

Kozh-Noe eo an ijinadenn rak kavout a raer roudoù eus ar filigranoù en Italia e-pad an XIII^vet kantved : kemmet e vez tevder ar paper pa oa gleb c’hoazh.

A-bouez bras eo ar filigranoù e bedig-bed an dimbrawouriezh, rak embannet ez eus bet rummadoù timbroù heñvel (liv, stumm, tresadennn) war-bouez ar filigran a ginnige, da skwer, ur gurunenn vihan hag al lizherennoù CA pe ur gurunenn hag al lizherennoù CC. Timbroù disheñvel int hervez an dastumerien.

War pep timbr embannet en XIX^vet kantved ha deroù an XX^vet kantved e oa ur filigran, met aet int da get dre vras, daoust ma kendalc'h broioù zo da implijout anezho.

E saozneg : watermark
E galleg : filigrane
En alamaneg : Wasserzeichen
E kembraeg : dyfrnod