Epstein didn't kill himself

Murlivadur eus ar frazenn a-us d'an Interstate 71 e Cincinnati

"Epstein didn't kill himself" ("EDKH") zo ur frazenn implijet a-enep an abeg ofisiel roet evit marv an den a arc'hant ha torfedour reizhel Jeffrey Epstein. Ar pennadurezhioù o devoa embannet e oa marvet dre en em grougañ en e gell e toull-bac'h ar Metropolitan Correctional Center e New York City e miz Eost 2019.

Epstein a oa bet un torfedour reizhel kondaonet hag en doa liammoù gant tud vrudet ha pinvidik er bed a-bezh. Pa oa bet toullbac'het e oa kalz tud o c'hortoz kaout digantañ anvioù torfedourien reizhel all, dreist-holl tud vrudet pe tud er galloud. Pa voe embannet ar c'heloù eus e emlazh e oa bet kalz martezeadennoù ha teoriennoù iriennoù hag a daole disfiz war gwir abeg e varv. Gant meur a zen eo bet tamallet d'ar pennadurezhioù klask kuzhat e oa bet lazhet met hep prouenn ebet.

Ar frazenn a oa troet d'ur meme internet, ha brudet e oa bet e miz Du 2019 pa oa bet embannet munudoù diwar-benn marv Epstein. "Epstein didn't kill himself" zo deuet da vezañ brudet e-mesk an dud, met an holl n'emaint ket a-du war "gwir" abeg marv Epstein. Dre-vras, difennerien an deorienn-se a embann eo bet muntret, dreist-holl dre e dagañ, hag e oa bet urzhiet gant tud ha na felle ket dezho e vije prouet e oant liammet ouzh tagadennoù reizhel an Afer Epstein ; en ur lazhañ anezhañ e vije bet mouget ar wirionez. A-wechoù e vez ouzhpennet d'an teoriennoù-se e oa ul listenn eus pratikoù Epstein, pe ul "levr du" lec'h ma oa skrivet anvioù an holl dud a c'halloud o kemer perzh en torfedoù reizhel lies, hag evel-se e c'hellje Epstein drouktunañ anezho ma vije ezhomm.

An tamalloù eus ur muntr liammet ouzh ar frazenn "Epstein didn't kill himself" zo bet implijet evel ur Poent Godwin gant tud ha n'emaint ket a-du etrezo dreist-holl war an dachenn bolitikel.