Hesiodos

« Pseudo-Seneca » : pell amzer e voe kredet e oa penn ar prederour stoikian roman, met gallout a rafe bezañ ur barzh kozh, Hesiodos marteze. Delwenn roman diwar batrom un delwenn hellenat (British Museum)

Hesiodos ha Plac'h an Awen, livet gant Gustave Moreau.

Hesiodos (Ἡσίοδος / Hêsíodos e gregach, Hesiodus e latin) a oa ur barzh hellazat eus ar VIIIvet kantved a-raok JK. Ganet e vije Hesiodos en Ascra, ur vourc'hadenn eus Beotia.

E vuhez

Ar fedoù

Tra ne ouzer diwar e benn nemet pezh a skriv en e varzhonegoù. Dre deir gwech e-barzh Al Labourioù hag an Deizioù, e ro un dornad munudoù diwar e vuhez. Un draig a lavar ivez en e d-Teogonia.

E dad a deue eus Cumes en Eolia, ur vro eus Azia Vihan entre Ionia ha Troade. Pe anv e oa, n'ouzer ket. Dios e vije bet, hervez an hengoun, met kement-se a deuje eus treuzkompren ur rannbennad «Πέρση, δῖος γένος}} / Pérsê, dĩos génos » (Labourioù, v. 299), komprenet evel « Perses, mab da z-Dios » e-lec'h « Perses, mab hael ». Perc'henn e oa d'ur seurt embregerezh aocherezh a voe rivinet gantañ.

Treuziñ ar mor a reas neuze, ha mont da chom da Askra ma prenas un tamm douar e-harz ar Menez Helikon. Eno e timezas gant Pycimède, ha daou vab o doe: Hesiodos ha Perses.

Ul lec'h paour e oa Ascra. Hervez Hesiodos e oa ur « bourk milliget, drouk d'ar goañv, kriz d'an hañv, morse e neze plijus » (Labourioù, v. 640). Deuet ar c'houlz da rannañ hêrezh e dad: bec'h a savas etre e vreur Persès hag eñ, ha prosez. Gant « rouaned» Ascra e voe lavaret edo ar gwir gant Persès. Hemañ neuze a gasas e stal da Gernetra, hag a eas da c'houlenn arc'hant digant e vreur a gasas anezhañ da sutal. Ha Persès, droug ennañ, a c'hourdrouzas Hesiodos , prest d'ober ur posez all d'e vreur. Hiroc'h n'ouzer ket.

Evit reiñ un tamm skiant d'e vreur hag e skoazellañ da gaout ur vuhez yac'h ha da verañ e beadra evel a zo dleet e savas Hesiodos ar varzhoneg Al Labourioù hag an Deizioù.

Al Labourioù hag an Deizioù

Savet eo an oberenn war an div wirionez-mañ:

• al labour eo lezenn ar vuhez;
• an neb a labour en devez peadra da vevañ atav.

Skrivet e voe pa oa al labour-douar o vont da fall, ha hellaziz o tivroañ da glask douaroù nevez da drevadenniñ.

Ouzhpenn labourat an douar e oa un aedes anezhañ, da lavarout eo ur barzh a save barzhonegoù evit o reiñ da glevout d'an dud. E C'halkis en Eubea, e kemeras perzh en ur genstrivadeg barzhoniezh aozet gant mibien ar roue Amphidamas da lidañ obidoù o zad. Trec'h e voe war ar genstriverien all gant ur varzhoneg a gane enni talvoudegezh al labour-douar hag ar peoc'h. Un trebez a voe roet dezhañ evel gopr ha dediet e voe gantañ da Vuzezed ar menez Helikon.

Mervel a eure en Askra. Pa voe distujet ar gêriadenn gant tud Tespia, e tec'has an annezidi da Orc'homenos. Hervez testeni Aristoteles en e Bonreizh Orc'homenos e voe dastumet ludu korf ar barzh, war-lerc'h un orakl, gant tud ar gêr-se, ha lakaet e-kreiz o agora, e-kichenik bez Minias, haroz ar geoded en-eeun. E-giz-se e voe lakaet Hesiodos gant an annezidi da ziazezer o c'hêr (οἰκιστής}} / oikistês e gregach).

Komz anezhañ e-unan en deus graet Hesiodos en e oberenn: karout a ra ar vuhez sioul war ar maez, an dilontegezh hag ar reizhded, doujañ ouzh ar relijion betek bout kredus, hep klask plijout d'ar roue, trawalc'h dezhañ reiñ skoazell d'e genvroiz, a brezege dezho ar vuhezegezh vat gant gwerzennoù brav. Gantañ eo bet ijinet ar varzhoniezh didaktek. Delwennoù a voe savet dezhañ war-lerc'h e varv e Thespies, Olimpia ha war ar menez Helikon.

Kanet e voe e varzhonegoù gant ar rapsoded ha brud bras a deuas dezho evel-se. Kalzig a varzhed a zo bet awenet gant Hesiodos, hag en o zouez

• Vergilius (en e Georgica),
• Caton an Henañ (en e De agri cultura)
• Lucretius.

Ar mojennoù

E skridoù kozh e kaver munudoù diwar-benn Hesiodos:

• an Ἀγών / Agốn, pe Disput etre Homeros ha Hesiodos, kenstrivadeg barzhonegañ etre an daou varzh , e gregach;
• Buhez Hesiodos, gant ar gramadegour bizantat Yann Tzétzès ;

Oberennoù

Mar deo anavet anv Hesiodos eo abalamour ma en deus skrivet diwar-benn ar mojennoù kozh en e oberennoù:

• Teogonia hag Al Labourioù hag an Deizioù .

• Teogonia (Θεογονία}} / Theogonía) a zo diwar-benn lignezoù an doueed ma kinnig enni ar bernioù doueed a zo meneg anezho er mojennoù, gant an tri remziad anezho: hini Ouranos, hini Kronos, hini Zeus a voe trec'h warno holl. Koshañ barzhoneg relijiel Hellaz eo. Ouzhpenn kontañ lignezoù an doueed ez eus el levr ur c'hosmogonia a grog gant krouidigezh ar bed hag ar C'haos.

• Al Labourioù hag an Deizioù (Ἔργα καὶ Ἡμέραι / Erga kaì Hêmérai) ;

• Skoed Herakles (Ἀσπὶς Ἡρακλέους}} / Aspìs Hêrakléous), awenet gant deskrivadur skoed Akilles en Iliada.

Oberennoù all lakaet war e gont

Koulskoude ez eus bet lakaet e-leizh a oberennoù all war e gont, en un doare faltazius:

Pennadoù kar dre o ster

• Oberennoù Hesiodos :
  • Teogonia,
  • Al Labourioù hag an Deizioù
  • Katalog ar Maouezed ;

• Homeros ;

• Hexamètre dactylique.

Levrlennadurezh

• Marcel Détienne, « Crise agraire et attitude religieuse chez Hésiode », Revue d'études latines, coll. « Latomus 68 » Bruxelles, 1963 ;
• (en) Richard Janko, Homer, Hesiod and the Hymns. Diachronic Development in Epic Diction, Cambridge University Press, 1982 (ISBN 0521238692) ;
• Marie-Christine Leclerc, La Parole chez Hésiode, Les Belles Lettres, Paris, 1993 ;
• Paul Mazon, introduction à l'édition de Théogonie. Les Travaux et les Jours. Le Bouclier aux éditions des Belles Lettres, Paris, 2002 (1^re édition 1928) ;
• Patrom:STLB ;
• Jean-Pierre Vernant :
  • Mythe et pensée chez les Grecs, La Découverte, Paris, 1996,
  • Mythe et société en Grèce antique, Paris, 1974 (1^re éd.).

• Arnodskrid diwar-benn Hesiodes hag e oberennoù.